自小學三年級和家人跟團去過曼谷和芭堤雅之後, 就沒有再搭足過泰國了~ 去年年尾見hkexpress有平機票(連稅HK$803), 所以就趁機去泰國第二大城市 - 清邁一趟~ 港元兌泰銖升至近期高位, 所以香港人在泰國使費便宜, 可以勁食勁玩~ 此外, 清邁沒有曼谷般繁華, 人煙亦沒那麼稠密, 加上一月屬於當地的冬季, 最高溫度不過30度, 而晚上就大概20度, 相對清涼, 所以整個旅程都十分舒服~ Day 1 乘坐17:35的hkexpress航機從香港飛清邁, 航程約2個半小時~ 抵達後, 本想搭的士到酒店, 不過開價甚貴, 所以在機場門外找架雙條車(50฿/人), 開往入住的Raming Lodge Hotel & Spa~ 酒店位於古城東門外, 近夜市區, 地理位置十分方便, 附近酒吧夜店林立, 房間乾淨寬敞, 性價比甚高(雙人房HKD$401/晚)~ 機場離市區很近, 但古城附近就有點塞車, 需時20-25分鐘~ 安頓行李後就行去古城區~ 是日為星期日晚, 有限定的週日夜市逛~ 從東面塔佩門開始的一段Rachadamnoen Road都變成行人專用區, 擺放著不同的小攤檔, 售賣遊客紀念品、創意手作和街頭小食, 還有街頭表演, 所以人頭湧湧, 熱鬧非常~ 由於未食晚餐, 所以先去醫肚~ 掃街試左豬肉丸(40฿)、蟹肉豬肉釀蟹蓋(25฿)、冬蔭湯粉(40฿)、雞絲湯粉(40฿)、鮮西瓜汁(25฿)等~ 豬肉丸十分彈牙, 配埋個泰式辣醬好好食~ 湯粉細細碗, 不過湯頭好味, 金邊粉又煮得剛剛好, 很爽滑, 街頭進食亦別具風味~ 然後再行到攀安寺(Wat Phan Ohn), 估唔到寺廟入面都有很多小食攤檔, 再試左泰式炒金邊粉(40฿)和豬紅米粉(25฿), 後者的味道怪怪的, 不推薦~ 食飽飽就買下紀念品, 逛至晚上十一點攤檔陸續收檔, 於是就回酒店休息~ Day 2 是日早上九時落去酒店餐廳食自助早餐, 款式不算很多, 以西式為主再加點泰式炒粉和炒菜, 味道都算ok~ 食飽就到酒店對面的Super找換店兌換泰銖, 匯率為1:4.551, 個價很不錯~ 然後就行去古城, 參觀清曼寺(Wat Chiang Man)~ 由於泰皇去年十月逝世, 所有寺廟和公共設施仍圍上黑白布條, 以示哀悼~ 其實清邁古城真的有很多大大少少的寺廟, 總有一間係左近, 可見佛教在當地的地位~ 清曼寺的主殿後面有座大象石雕做底座的金頂佛塔, 算是該寺廟的一大特色~ 逛完再回酒店休息~ 下午四點再出發到古城, 沿Ratmakka Road行, 途中參觀帕考寺(Wat Pha Khao)~ 寺廟的門口種滿花卉, 顏色鮮艷~ 庭園擺放了不少公仔雕塑和風車, 同時播放著好似武俠RPG遊戲的輕鬆音樂, 還有cafe和按摩攤檔, 氣氛非常relaxing~ 之後又到柴迪隆寺(Wat Chedi Luang)以及旁邊的柚木古廟 - 盼道寺(Wat Phan Tao)一遊~ 下午五時許就到泰北菜餐廳Huen Phen食晚飯, 該餐廳的午市和晚市的菜單和地點都不同~ 晚市在有特色裝潢的古宅內, 點了乾咖喱炒豬肉蔬菜、辣肉碎生菜包、特色炒飯~ 前兩者的份量偏少, 辣肉碎實在太辣, 味道感覺正宗但唔係我杯茶~ 特色炒飯加入清邁扎肉, 味道不錯~ 埋單300฿, 性價比一般~ 飯後試左街頭小食香蕉薄餅(40฿), 有些攤檔賣的是印度roti薄餅, 有的就是法式crêpe~ 我就試左前者, 薄餅夾著香蕉並加上朱古力醬, 香脆可口, 不過都幾油膩~ 然後到夜市區的Big C超市買手信, 當中包括泰國限定的冬蔭功味百力滋和芒果味熊仔餅~ 點擊圖片放大 Day 3 是日報左8 Adventures的三小時越野車(all-terrain vehicle)package(2700฿/人), 上午十一點半搭冷氣小巴從酒店到8 Adventures大本營, 車程約個半鐘~ 出發前先食午餐, 有炸雞扒飯、沙律和水果, 比預期中豐富~ 其實大部份人都係去玩激流, 玩ATV的只有五人~ 我們先聽trainer講解ATV操作, 其實都是自動波, 只需要加油和剎制, 沒甚麼難度~ 然後就分配戰驅和領取頭盔, ATV都算新淨, 機件良好, 而頭盔就有埋action cam mount, 非常貼心~ 兩點鐘準時出發, 先駛到training track兜幾圈熟習操控, 但其實係最好玩的一部份, 因為條track係路面不平的泥路, 並有好多泥窪和小斜坡, 高低起伏, 有時要俾大油先過到~ 玩完training track就正式起行, 有領隊帶路, 一架跟一架行, 十分安全~ 前半段都是沿馬路駛, 之後進入山頭, 開始有泥路~ 中途抵達一水壩小休~ 小休後就繼續玩山路, 在叢林裡穿梭看看風景, 非常寫意, 末段還有機會駛落小溪濺下水花~ 回到大本營剛好是五點鐘, 足本冇呃鐘~ 玩完的後遺症就係手指公超攰, 因為ATV係用手指公控制throttle加油, 仲要撳足三粒鐘~ 玩完就搭車回酒店, 之後到古城東門附近的通美味(Hear Tong Food Shop)食地道泰菜, 小店很有鑊氣, 點了冬蔭海鮮湯、炒雞肉金邊粉、炒雜菜、青咖喱鱸魚柳和泰式凍奶茶~ 冬蔭功好好飲, 濃濃的香料味, 辣度適中; 配料足, 有蝦有魷魚~ 青咖喱好重椰汁味, 其他菜都好好食, 埋單只需400฿, 十分抵食~ 飯後到夜市區一遊, 都是賣遊客紀念品和衫褲為主~ 點擊圖片放大 +2 Day 4 跟前一日一樣都是報了half day tour, 這次是Elephant Jungle Sanctuary的大象保育營(1700฿/人), 標榜不騎大象, 跟大象有更多互動~ 同樣都是上午十一點半從酒店出發, 但今次就係搭雙條車, 所以個半鐘頭的車程的確坐得有點辛苦~ 抵達保育營後, 先換上當地卡倫族(Karen)的傳統服飾, 然後由導賞員講解該保育營的歷史和運作, 以及跟大象互動要注意的事項~ 當天有近四十位的參加者, 基本上全是西方人, 只有兩三張東亞人面孔~ 聽講完畢就分別到兩個大象營探望兩個大象家族, 合共八隻大象, 有老有嫩, 十分可愛~ 每人都有大量香蕉和竹蔗給大象餵食, 可放到象鼻, 或直接放進口, 感受一下大象口水~ 餵食完就換衫跟大象浸泥漿浴和到河裡洗澡, 一開始大家都在幫大象潑水和刷身, 之後就互相潑水, 玩得盡興~ 之後再到附近一瀑布水潭跳水, 對我來說駕輕就熟, 比西貢四疊潭還要矮, 惟河水比較黃, 所以浸一陣水就去沖身換衫~ 勞動一輪之後, tour安排了些食物 - 咖喱雞飯、煎蛋和炒菜, 以補充體力~ 跟大象臨別之前, 導賞員更派發神秘禮物 - 印有大象圖案的小布袋, 蠻有驚喜~ 另外值得一提是整個tour都有專人影相, 並把相片免費放上facebook, 不另收費, 值得讚賞~ 回到清邁已經是晚上七時許, 所以就到酒店附近的草垛夜市(Ploen Ruedee Night Market)搵食~ 那裡是個露天food court, 有近二十檔食肆, 以泰式和西式為主, 也有些其他亞洲菜~ 正值晚飯時間, 所以人氣很高, 非常熱鬧, 還有live music邊食邊聽~ 試了小食清邁香腸(30฿), 香茅味重, 都好食~ 另外就幫襯左人氣檔口手撕海鮮, 點了一set泰式辣醬炒海鮮(299฿), 賣相好似好大碟, 但其實份量一般, 兩個人食都食唔飽, 而且等候時間較長, 起碼等左25分鐘~ 個辣汁其實幾好, 但配料就比較普通, 只有蝦、青口、魷魚和粟米~ 食完再到food court旁的小店食埋泰北咖喱麵(Khao soi)和魚蛋粉, 連兩杯果汁只需150฿, 比food court便宜~ 點擊圖片放大 +2 Day 5 踏入行程最後一天, 早上九時就出發, 先乘Tuk Tuk(35฿/人)往北門的雙條車站~ 再跟其他人拼車(50฿/人)往素帖山雙龍寺(Wat Phra That Doi Suthep), 車程約半小時~ 素帖山海拔超過一千米, 所以末段都是盤山路~ 到達雙龍寺後就再轉另一架雙條車(來回400฿/人)往隱秘的苗族村落坤昌阡(Khun Chang Kian), 車程約40分鐘~ 這段路以泥路為主, 路窄且顛簸, 很多時都需要單線雙程行駛~ 坤昌阡一月中至二月頭有櫻花盛放, 配合苗族的高腳屋, 頗有世外桃花的感覺~ 櫻花樹的數量比想像中多, 大概有二十多棵, 但不太集中~ 櫻花未是最盛放, 但都已經很漂亮~ 遊人也不算多, 可以盡情在粉紅色的花海裡大影特影~ 那裡也有攤檔賣士多啤梨, 價錢由20฿至200฿不等, 悉隨尊便~ 之後乘車沿路返回雙龍寺~ 在雙龍寺附近的攤檔試了特色小食Kanom Krok(20฿), 就像椰汁西米糕用類似雞蛋仔烘盤焗香, 令外層焦脆, 加上蔥花出奇地提升了味道, 很好食~ 之後搭雙條到清邁大學(40฿/人), 在正門附近的Lonelymilk cafe食午餐, 點了泰北咖喱麵、冬蔭湯粉絲、炒通菜、香葉包雞和芒果糯米飯~ 食物味道尚可, 埋單約฿350~ 食飽就進清邁大學參觀, 遊客一定要買飛搭電動車(60฿/人), 環繞大學一周, 需時30分鐘, 而中途不能下車, 只在最著名的淨心湖(Ang Kaew Reservoir)停留10分鐘~ 校園面積很大, 但沒甚麼看點, 只是當日有很多學生在影畢業相~ 淨心湖平靜如鏡, 水面的倒映十分漂亮~ 參觀完就搭雙條回酒店(40฿/人), 再乘酒店專車到機場(100฿/人)~ 在機場食個老麥晚餐, 然後就乘坐20:25的航班回港, 結束輕鬆的清邁之旅, 回到香港已經近半夜12點了~ 點擊圖片放大 +3
