2月初嘟嘟妹去左鹿兒島嘅時候，發現左間好好食嘅拉面店，事實上嘟嘟妹去左兩次鹿兒島，第一次去左食『我流風拉面 』，個時因為天氣好凍，所以食番碗熱騰騰嘅拉面真係世紀級好食！但今次嘟嘟妹去左位於天文館通嘅《鹿児島ラーメン豚とろ天文館》，呢個拉面我覺得係鹿兒島第一！ 個日嘟嘟妹去嘅時候大概係下就2點至3點呢個非繁忙時段，但我都要排大概15分鐘就入到去食，可見呢間拉面店真係人氣熱店～ **嘟嘟妹小提醒：係呢個肺炎時期，要做好個人衛生，一定要勤洗手！大家有無乖乖咁袋定濕紙巾同埋酒精搓手液係身到？♪ ♫ 事不宜遲，即刻去圖啦～ Step❶ : 首先一入到去呢一間《鹿児島ラーメン豚とろ天文館》，記得唔好咁快即刻去坐，一定要去近門口嘅機到比錢買左拉面票先，因為呢間店係無人手點單服務～所以你一定要係呢部機點哂你想食嘅野同埋要求～例如：多蔥/少蔥/走蔥 等等～ Step❷:買好票之後，就會有個員工黎收你張票，佢就會即刻煮你個個拉面了！同時，你可以坐定定同埋食下前菜先～ 食評：呢個醃蘿蔔真係超級好食，酸咸度岩岩好，蘿蔔又爽脆，最岩用黎做開胃菜～ 因為呢間店鋪嘅員工比較少同埋人流都比較多，所以如果你計劃去呢一間鋪頭到食～記得一定要預留大概1小時（包括：排隊同等野食）～ 今次嘟嘟妹叫左半熟玉子豚肉拉面（普通），價值係1000 yen（約$70港幣） 食評：如果你同嘟嘟妹一樣其實食量唔大，叫普通份量就可以了！但呢間黑豚真係一試難忘，因為一擺入口，係唔洗咬！！黑豚嘅油脂會溶左係你嘅舌頭上，你完全會感受唔到肉嘅質感～如果你覺得太油，可以夾埋蔥一起進食～咁就係perfect match!至於個湯底，嘟嘟妹會覺得比較偏咸但有好濃嘅豬豬味～湯頭完全唔會太澀，連嘟嘟妹都飲哂成碗就知～面質方面，老實講嘟嘟妹對面質無咩研究，而日本拉面店大部份都可以比人簡面嘅軟硬度～所以都可以滿足中意食唔同軟硬程度嘅大家～ 如果你覺得好好食，呢一間拉面店店內有拉面手信賣嫁！入面就係佢地家嘅招牌拉面～咁就番到香港都可以懷念下日本嘅味道啦～ 店鋪：鹿兒島拉麵 豚とろ 天文館 地址： 11-17 Higashisengokucho, Kagoshima, 892-0842 營業時間：1030-2100
