任你化了一個完美的妝、穿著一身潮流服飾、恤了本季新髮型，有沒有在不經意之間流露了一點點麻甩的味道呢？禮儀不是法律，你不做不會怎樣，不過是尊重自己、以及出於「己所不欲，勿施於人」的精神而已。以下是一些「常識」加一點自己的所見所聞，希望對你有所提醒： 第一篇：日常禮儀 一、請你做以下動作時掩口： 打呵欠（咪以為你知道等於你有做，問一問身邊啲同事朋友先最接近真相） 咳嗽（好多人仍然無呢個「常識」） 打噴嚏（同上；萬一你喺地鐵做緊低頭族，你隔離有位背心阿叔打乞痴無搵手遮住，啲口水鼻涕跟住車箱行駛方向洒落你後頸同手機螢幕度...我只能夠致以深切慰問，及請你同佢分享呢篇嘢。） 剔牙（請勿用筷子或手指剔牙）（有人發明牙簽已經好好啦，咪貪方便用筷子或者手指呢啲麻甩行為。） 二、請勿在公眾地方做以下動作（洗手間除外）： 擠暗瘡（唔洗解釋啦，去洗手間或者返屋企先啦） 剪指甲（指甲碎會周圍彈，請你忍一忍咪貪方便，畀啲安全感你身邊0既同事朋友） 清理指甲內藏的污物（去洗手間攪啦，周圍好多眼架，尊重自己） 脫鞋（日頭行路多少有啲腳汗，請有儀態少少，唔好除鞋臭親人，就算無味都唔洗架啦唔該，知道你啲腳趾好靚架啦唔該） 揉眼睛（或清理污物）（手指污糟，請勿卒眼，要卒請去洗手間） 挖鼻（曾經喺甲級商廈內遇到一個身穿皮褸一身衣著唔似無讀書0既港男，喺四邊都係鏡0既電梯裡面。了。鼻。屎。跟手用手指尾彈走繼續了...請你自己唔好做之餘，提醒你身邊所有人去洗手間處理呢啲嘢。） 挖耳孔（國內男同胞最鐘意留長手指尾指甲愛黎了耳屎，我作出鄭重呼籲：請追求文明轉用棉花棒，有時要握手其實我係驚驚地，女士們我哋都唔好做。） 化妝（呢件事唔會木無表情咁做，點都會有少少戚眉戚眼甚至”咩”住嘴黎做，早少少起身或者返到公司喱埋化啦。） 三、請你任何時候都不要做：搖腳（un 腳，麻甩必做） 四、任何時候都鼓勵做： 讓座（最好能成人之美）（成人之美即是，假設地鐵座位o是空的，x是有人坐的：xxooox，你上車選了左起第四位，xxoxox，這時一對朋友／情侶／夫婦進來，你能察覺得到並且讓出自己的座位（向左或右順延一個座位），讓他們能坐在一起，就是成人之美，功德無量） 最後一個進出門隨手關門（輕力）（請努力記住，最好閘門0既力度輕到好似做賊咁就最完美；如果房裡面無人，輕手啲當愛惜物件；如果房裡面有人開緊會或做緊嘢，以盡量唔畀人察覺到有人進出房間為大前題，騷擾到越少人越好。） 到訪別人家，不要坐在人家的床上。 請別人幫忙時，給對方有選擇的權利。（麻煩你可唔可以…唔該你可唔可以幫我…令到人哋幫你幫得舒服、心甘命抵，咪自己樣衰，老奉要人幫，要人哋幫你幫到心底裡面渺咗你都唔知） 五、手袋內常備紙巾及濕紙巾 身邊總會有一兩個比較論盡0既朋友，成日袋住包紙巾實無死；至於濕紙巾，用於平時清潔，而且亦係女士們月事時0既好幫手。 六、用八達通卡付款時請拿出卡在手上準備，切勿站在收費機前才起勁找八達通卡，或把手袋拿在收費機前晃來晃去，引起在後的人不耐煩，也能避免手臂肌肉變粗。（尤其分享呢件事畀你身邊上咗年紀0既女士知，根據非正式統計佢哋最鐘意咁樣磨手袋） 七、和親友在一起時（用餐時、聚會時、傾談時）不玩弄手機，也能減少患上數碼癡呆症*的機會。（除非每個人都「同時」玩手機，否則應尊重每一個人，珍惜面對面傾偈0既機會。） 數碼癡呆症*： http://orientaldaily.on.cc/cnt/china_world/20130530/00180_008.html
