年三十晚整個超簡單既桂花酒釀丸子應下節! 桂花酒釀丸子好補身㗎! 尤其係女仔要食多d。 新一年祝大家身體健康, 開開心心,心想事成,出入平安,彈藥充足假期充裕想去邊就去邊! 預備材料: 糯米粉, 水, 酒釀, 糖桂花, 冰糖 份量呢? 適量。 適量?! 係呀! 話明超簡單磅都唔使磅呀! 吓?我common sense有d炆㗎喎? OK。。。 每個人預大約一個益力多樽糯米粉應該夠你食到濟。 酒釀, 糖桂花你唔係煮幾十人的話買一罐/兜夠㗎喇 *酒釀, 糖桂花上海舖(eg.老三陽, 街市)有得賣(烘焙舖都可能有)。有d佳寶同大d既超市都有玻璃罐裝酒釀, 但都係覺得有時間去上海舖買膠兜裝自家製既好味d, 仲冇防腐劑添! *酒釀記住要雪呀! 所需工具: 煲, 碗 (完,真係完) 做法: 1. 倒出適量糯米粉, 加適量暖水搓至變成粉糰。拎出小量搓成條狀, 搣成一粒粒。(暖水會煙韌d) 咁究竟落幾多粉幾多水? 其實冇一定既比例, 因為會受天氣同糯米粉本身潮濕程度影響。要搓到可以搓到埋一齊, 但可以輕易搣開, 而且搣完一粒粒就咁放哂落個乾既碗係唔會黏埋一齊。要做到呢個程度係比想像中乾㗎。 新手最好唔好一開始落哂所有粉, 慢慢落水, 搓下再落, 因為d粉要d時間吸水, 萬一水多得濟可以落返多小小粉。 參考: 尋日整4-6人份量落咗大約400ml(用量杯)粉, 落咗大約150ml暖水, 即係約8粉:3水, 真係大約㗎咋 點擊圖片放大 +3 2. 上個step差唔多完可以煲水喇。 唔識預要幾多就用碗裝水倒落去, 落你想食到既份量再多少少就ok。 再落適量冰糖。 要溶哂試味, 落到啱啱試到有少少甜味就ok, 因為之後再落糖桂花都係甜㗎嘛。 3. 一切ready就可以倒丸子落去(滾水落), 再攪佢幾野就由佢滾。丸子如果濕度啱係唔會黏埋一齊。 4. 滾到丸子浮起就熟喇, 你而家可以選擇 A.即刻撈起所有丸子放落冰水/凍水過冷河(超煙靭但麻煩) B.熄火等佢縮返細(其實都ok,通常揀B哈哈) 5. (如果揀咗A倒返哂d丸子落去)落糖桂花再滾兩下熄火落酒釀, 落幾多事乎個人口味。 酒釀千其唔好煮佢, 煮得耐會變酸。 6. 食得! ************************************************************************* [Cooking W] W除咗鍾意周圍去之餘重好鐘意整嘢食。既然大家成日食完問我點整，Cooking W系列暫時會成為追夢‧闖蕩‧看世界嘅副線，同大家分享整嘢食嘅樂趣。既然整嘢食係一個樂趣，W唔會用預拌粉，少用香精色素，盡量用最原始嘅材料製成最好味嘅嘢食，亦盡量解釋每一個步驟，等生手嘅都可以一齊享受整嘢食嘅樂趣。ENJOY! 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
