#31/10/2014 #Itaewon, Seoul 同host byebye咗之後由清涼里搭地鐵去鐘路5街。 由於比預期早咗一日出首爾, 所以未bk地方住。 去咗總之後幾日住嗰間先, 不過冇位。 同個reception傾咗陣, 仲送咗halloween糖俾我, 隱居咗田園咁多日真係唔記得今日係halloween 好彩隔離嗰間唔貴又有位, 唔使周圍搵。 安頓好就出去喇。 今日得個下晝, 要休息下同輕鬆下, 鬆下學劍道搞到好痛既筋。 M: line 6 梨泰院, exit 3 嚟到韓國點都要試下國民休息埸所汗蒸幕! 有睇韓劇一定識汗蒸幕, 係韓國好傳統既三至八十歲消遣埸所。你諗多咗就恐怕令你失望喇, 呢度係好正氣, 冇邪骨揼㗎。 試下出名地道既梨泰院Land, 韓劇秘密花園就係響度拍。當日去有大部份係韓國人。響地鐵行去途中見到天價貢茶, 仲貴過starbucks... 果然係物離鄉貴, 要考慮下去外國開魚蛋舖。 地鐵3號出口直行, 行都一段距離, 行到見到對面馬路有7仔就差唔多到喇。 目的地響你右面一條都幾長既長樓梯上面。本身冇疲勞去到都包你有疲勞可以消除! 首先要響counter俾錢, 平日6am-6pm入場￦8000, 6pm-6am/weekend￦10000, 可以留24小時, 俾完錢拎衫,毛巾鎖匙, 之後就男一邊女一邊搵返自己number既鞋櫃放鞋, 再上樓就係大家既緊張時刻, 脫光光既更衣室喇! 一個人去真係零個老尷, 邊個識我? 兼且其實光脫脫去温泉/汗蒸幕係非常普通既事, 既然入鄉隨俗又何必尷尬呢。 響呢個時候, 淨著底底既阿豬媽會走黎問你搓唔搓澡, 我黎其中一樣就係想試搓澡! 如果搓就俾大約￦20000現金阿豬媽, 唔搓都ok既。 唔想佢幫你洗頭或者想慳錢可以話唔洗頭, 會平大約￦3000。阿豬媽英文有限, 但都好友善咁幫手。 跟著搓唔搓都係搵返自己number既locker, 放低一切既身外物, 淨係留返你既鎖匙肉體同沖涼用品。係呀! 記住自備沖涼梘! 冇帶就焗住幫襯佢。 搞掂就好似平時沖涼咁響側邊d位度沖涼, 情況就同日本浸温泉差唔多。跟著就去浸池喇, 如果幫襯咗阿豬媽, 你一個麻瓜咁既樣佢會得閒走黎望下你, 等你浸都差唔多就會嗌你去搓澡。 你會訓向張床度, 阿豬媽會用搓澡布響你身上不斷用力省。 相信大家都聽過唔少次浮誇既經歷, 而我當然冇例外。 平時無論你沖涼沖得幾乾淨, 都冇一幸免會俾阿豬媽響你身上省出浮誇多既死皮老泥, 係真係你想像唔到咁多, 就好像落雪咁。重申一次, 真係無論你平時沖涼沖得幾乾淨, 浮誇既事都係會發生, 因為我見個個都係咁, 連熟客仔都係。阿豬媽好好人, 仲唔收錢同我洗埋頭, 話special special free free, 拒絕都拒絕唔到, 超熱情。 做完真係好似滑咗, 雖然唔平, 但係人一世物一世, 點都要試一次。 其實嗰d搓澡布係響嗰度同街都有得賣, 而且唔貴, 不妨買黎試下。 再浸池浸到夠就可以着佢提供既衫上一層去焗房同其他設施喇。 建議女仔可以帶個舊bra/有pad背心仔著。 雖然件衫唔係好薄, 但汗蒸就係要蒸到你濕, 你懂的。I am sexy you know it. 點擊圖片放大 +3 黎到梗係要挑挑個火汗蒸幕佢。 傳統汗蒸幕其實係指一個好似窰洞既房仔, 響裏面真火燒特定既木頭燒熱間房, 再透凉到適合焗既温度。因為咁, 真既火汗蒸幕都會響凌晨時間暫停, 而梨泰院land會停0400-1000。1400同1900都會有短暫暫停。 鼓起勇氣拉開嗰道乜都睇唔到既門仔烏低身入去。 真係好熱!!! 好似入咗焗爐烤人肉!!!! 好呼吸困難!!! 格硬響門邊掙扎咗幾十秒就敗走咗, 換來入面坐得非常舒泰既阿就西恥笑既眼神。 OK我真的輸了, 唔識欣賞。 跟著去焗下唔同既房, 其他既大部份都幾舒服。有間石春房, 頂得順既話入去行下包你行氣活血。焗都夠哂就返落更衣室攞返部電話周圍參觀影下相。 呢度好大, 除咗大廳可以訓, 仲有分男女睡房, 有一格格獨立格, 仲裝咗暖板添。重有另外俾錢嘅guestroom。仲有兒童遊戲室, 帶小朋友都唔驚悶。 點擊圖片放大 +3 黎汗蒸幕梗係要試下燻蛋甜米釀喇, 都唔算好貴, 3隻蛋1杯野大約卄蚊。 係3隻3隻咁賣, 1個人真係食到爆血管。用鎖匙嘟就得, 走先一次過俾。 點擊圖片放大 唔諗住過夜就要睇時間走喇! 落返樓, 咦! 開唔到鞋櫃既? 原來要找哂數先。。。 呢招絕呀! 去旅行去到唔記得哂日子, 一出門口就提醒我係Halloween. 梨泰院其實係首爾老蘭, 非常多人。 而我呢個唔鍾意clubbing既人呢個時候梗係速閃。 點擊圖片放大 +3 返到hostel重有halloween party! 係好好嘅機會同來自其他地方嘅旅人傾吓計，係旅程嘅重要部份嚟㗎! 放鬆哂個人真係超好訓, 叉個靚電! 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
