#29/10/2014 #Gapyeong-gun, Gyeonggi-do 朝早去睇雞發現生咗2隻蛋呀!!! 開心真係可以好簡單 點擊圖片放大 今日都有劍道堂, 琴日已經chur親我久未運動既肩胛肌肉有d痛, 不過都要堅持! D動作顧得手就顧唔到腳, 勁唔協調, 同埋其實都幾攰, 不過原來砍野都幾爽(係有d變態) 話說其實我唔食得辣, 而韓國係乜野都辣, 連狗仔都係食辣飯, 其實狗真係可以食辣野? 英文miss下晝買咗tea, 有紅豆糕餅同水葡萄, 個人覺得唔係幾好食 今日體驗學習出咗去行山。 應該係為我而設, 我話講開香港冇紅葉, 佢地話一齊上山睇下, 咁就同咗我去。 一路chur斜路上雲岳山, 真係好鬼超級靚, 漫山遍野都係紅色。終點係懸燈寺, 要行好多級上去。 我地好晏先去, 落山已經天黑, 變咗行夜山。 點擊圖片放大 +15 出返村口有個"得男石"水池, 唔使多講, 有圖。 落返山係呢d咁鄉下既地方食真正既韓燒, 其實同香港嗰d好唔同。 就咁燒熱塊板就放d仲未解凍又完全冇醃過既五花腩落去煎, 煎到脆就點椒鹽麻油或者豆瓣醬, 或再加生菜/其他蔬菜泡菜食, 除咗肉, 仲會煎泡菜/洋蔥/蒜子。 當然酒係唔少得喇, 真露係必備既(火)酒。 重點黎喇, 話咗韓國人冇飯冇力, 食飯必備飯同泡菜, 食到差唔多就要隊碗飯。 已經煎五花腩再點油㗎喇, 仲隊碗飯, 諗下都濟。不過有機會試到真正地道既韓燒都係幾好既體驗, 其實唔係真係咁好食, 不過香港d"韓燒"除咗塊板真係冇乜野似 (不過其實我覺得香港嗰d好食d...) 點擊圖片放大 +9 原來老師房個柴爐除咗暖仲可以煙燻蕃薯! 今日霄夜仲有燴蕃薯, 真係好幸福。 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
