焗出嚟超棉超滑超香，香到出完街食飯一入門口都重超香! 重點係天然香唔係香精香！ 預備材料: 班蘭葉5大片 熱水 1 1/2湯匙(tbp) 蛋4-5隻 砂糖 80克 低筋麵粉(cake flour) 100克 泡打粉(baking powder) 1茶匙(tsp) 椰奶(coconut milk) ~100-120毫升 食油 3湯匙(tbp) (建議使用)他他粉(塔塔粉, cream of tartar) 1/2茶匙(tsp) *班蘭葉一般東南亞食品舖有售(好大陣香料味,好多工人姐姐嗰d呢), 買咗一包5塊只係3蚊雞, 係平野呢既 *油用平時一般煮飯用嗰d粟米油芥花籽油都ok, 要用室溫係液體嗰d(oil), 唔好用會變固體嗰d (fat) eg牛油豬油, 同最好唔好用太重味既油eg花生油, 咪個蛋糕會有花生味 *椰奶(coconut milk)並不是椰漿(coconut cream) ,如果淨係買到椰漿可以試下一份椰漿溝約1至3/2份水溝稀, 份量以溝稀咗計 *泡打粉(baking powder)並不是蘇打粉(baking soda), 係唔同野呢㗎 所需工具: 一定要: 磅, 蛋糕模, 焗爐, 電動打蛋器, 大碗數隻, 最好有(代替品): 量匙(攞其他匙預), 量杯(有刻度水樽/磅), 攪拌機(菜刀), 篩, 刮刀(大湯匙), 牙簽(針/筷子) 非必須: 細煲魚袋 做法: 1. 將班蘭葉洗乾淨隨便剪開。放入攪拌機，加1 1/2湯匙熱水攪。冇攪拌機的話都可以試下響砧板用菜刀當肉餅咁啄 2. 將班蘭葉碎放入煲魚袋，用手榨出班蘭汁。冇煲魚袋都可以用手榨。要榨2湯匙班蘭汁。冇可以用手榨，不過要過返篩。 3. 將班蘭葉碎放返入攪拌機，加椰奶攪，再篩出100毫升椰奶。(冇攪拌機就直接用100毫升椰奶) 4. 開4隻蛋，分開蛋黃蛋白，蛋白一定唔可以有蛋黃。最好每開一隻蛋都開落個飯碗度先, ok先放落大碗, 咪有壞蛋或者打爛蛋黃都係蝕一隻 5. 用刮匙將蛋黃和20克幼砂糖拌勻。 6.加入椰汁同班蘭汁拌勻。 7. 將低筋麵粉和泡打粉分3-4次篩入，用手拌勻，由中間慢慢攪啲粉入去。 8. 拌入油，備用。 9. 預熱焗爐至 170C 10. 用一個乾淨大盤（必須冇水冇油冇蛋黃），用打蛋器將蛋白打至起泡(穩陣就用低速(1/5度))。 加他他粉，冇他他粉可以用2滴白醋。 11. 分3-4次加 60克糖，(加哂野可用中速(2-3 /5度))並打至蛋白企身，好似忌廉咁，“廊”個兜要“廊”唔郁d蛋白。理論上可以好似電視咁倒轉放上頭都唔跌落嚟，不過唔同兜可能唔同。得咗就唔好再多手攪多幾野。如果打到分離咗白色野同黃色透明液體，恭喜你，你兜野有水／油／蛋黃又或者打過龍，可以開新蛋再打過，係冇得救嘅 12. 分3-4次將蛋白fold-in入麵糊(#8)中，輕手由盤邊反起底嘅放上面，重複至拌勻。 13. 倒入蛋糕模(不要唔使搽油)，放入已預熱焗爐，焗約15分鐘後, 再將焗爐溫度降至150C再焗，直至熟透 (大概再20至25分鐘，共35至40分鐘)。用牙簽插入蛋糕中央測試，沒麵糊黏著，即係熟透。 未得 得咗 14. 拿出焗爐，反轉放響鐵架上放涼。完全冷卻後，就可以脫模，搞掂。 ************************************************************************* [Cooking W] W除咗鍾意周圍去之餘重好鐘意整嘢食。既然大家成日食完問我點整，Cooking W系列暫時會成為追夢‧闖蕩‧看世界嘅副線，同大家分享整嘢食嘅樂趣。既然整嘢食係一個樂趣，W唔會用預拌粉，少用香精色素，盡量用最原始嘅材料製成最好味嘅嘢食，亦盡量解釋每一個步驟，等生手嘅都可以一齊享受整嘢食嘅樂趣。ENJOY! 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
