#Munich, Germany #29/06/2013 Metro: U6 Frogmaning 個人有d攰, 諗住去咗遠d既地方先。 去拜仁既, 去歐洲點都要睇下球場既。 搭地鐵去喇, 地鐵點知有幾個站關咗要上地面搭接駁巴士。 地鐵d班次又疏, 巴士又慢, 用咗個勁時間先去得到, 不過搭巴士都睇到唔同既野, 住宅區同埋香港唔會有既車上外賣麥記, 即係好似停車埸揸車泊埋counter落order, 佢會遞野食入車窗俾你。 去到又凍又落雨, 因為好空礦所以非常大風。千辛萬苦去到點知今晚有唔知乜比賽德國對日本所以冇得入去lol 又要一大輪巴士地鐵先走到, 真係行大運, 仲要程地鐵一d都唔平。 點擊圖片放大 +8 Metro: Frogmaning -U6-> Muchner Freiheit -U3-> Olympiazentrum 去睇BMW Welt, 好似係唔使錢入埸。入面有好多寶馬, Mini Cooper 等等既靚車俾你任坐, 影相一流。 對車既歷史冇乜興趣就冇過BMW Museum。 去埋隔離奧林匹克體育場Olympiastadium睇下, 搞緊x game好多人, 又唔會買飛所以望兩眼就冇再行入去lu。 點擊圖片放大 +5 Metro: Olympiazentrum- U3-> Marienplatz 出返市區去谷物市場Viktualienmarkt, 我就最鍾意行market㗎喇! 唔係好大但算多野賣, D野唔算貴。 由於太早淨係買咗士多啤梨食, 仲平過香港呀。建議黃昏去掃dinner, 不過要留意有d日子會早收。 點擊圖片放大 +4 行去聖母教堂, 都係普通既教堂。。。 行返去Marienplatz, 新市政廳Neues Rathans個建築好靚。 有班人響度示威反對起清真寺, 勁多警察圍佢地, 外國示威成日搞到暴動咁, 見到呢d埸面梗係望兩眼即閃。 呢個area好多教堂, 每逢搭正成個城市就會響起古老既鐘聲, 好有feel, 同埋d人冇得遲到哈哈。 點擊圖片放大 +6 沿路行去Odenosplatz睇皇宮Munich Residenz同統帥堂Feldherrnhalle, 咁啱有event有d檔攤響度, 唔知平時有冇呢。 呢兩度感覺冇乜特別, 都係冇入到去。 地鐵站附近準備緊大型既怪獸大學宣傳, 不過未開始, 冇得睇。 正當我擺腳架自拍既時候, 有一個白人鬼佬帶住一黑一白既小女孩同我講兩個小朋友想同我影相可唔可以, 梗係得, 咁就影咗張好世界大同feel既黑白黃皮膚。 其實嗰兩個小朋友係咩關係呢? 如果係一家人都幾得意。 爸爸係白人媽媽係黑人? 其中一個係領養? 不過見佢地都幾warm幾開心, 其實乜膚色既人都係一樣既啫。 點擊圖片放大 +4 Metro: Odenosplatz -U3/6-> Marienplatz 醒起唔記得去皇家啤酒屋Hofbrauhaus, 搭地鐵返轉頭。 其實下次可以去Odenosplatz先, 由皇宮一路順行, 最後去market食野。 聽d人話如果想食德國傳統野可以黎呢度試, 唔算非常貴, 不過我一丁友 唔食得d乜, 都係參觀下算。 入面好多人好喧鬧, 裝修好靚 講德國就梗係唔少得啤酒。 行超市睇下有乜啤酒賣。 原來真係非常多種類, 仲會有mark住"Alkoholfrei"既無酒精啤酒。 買咗個無酒精既Dunkle Weibe試, 其實好奇怪唔好飲。 今晚搭夜車, 返hostel問有冇地方可以俾我沖涼, 但俾咗個private shower我。 真係不得了超級大同正, 仲正過響房沖, 私人廁所加6個人都可以輕鬆一齊沖涼既area, 有冷氣既dry area大到可以開哂個大喼執仲有長櫈可以攤d野出黎執同坐低吹頭。 住hostel真係好, 3次夜車都有地方沖涼。沖完個靚涼響hostel common area霸咗個靚梳化位, 趁仲happy hour去hostel bar嗌咗€1杯慕尼黑生啤。 嘩呢杯好味好多。 響度hea下訓下等到差唔多就出去火車站。 今次夜車係坐seats, 同廂有一家人, 兩公婆加3個小朋友, 好彩小朋友都算乖, 仲要因為佢地響我對面打橫訓咗上張櫈上面, 咁我就可以盡情隊對腳過對面, 點坐都得。 舒服一定唔係好舒服㗎喇, 不過好似仲訓得好過訓6-couchette Train: Munich Hbf -> Venezia Santa Lucia (change: 0) Dur: 8:54 2340/0834 £19 seats online advance (paper ticket in HK) 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
