話說我就參加咗U Blog既活動, 去黃金海岸酒店同一班bloggers 一齊嘆海鮮自助晚餐。每次入黃金海岸都有渡假feel。 我呢個小薯仔有機會同班去勻世界各地, 食勻大江南北既師兄姐傾計, 簡直係增廣見聞大開眼界。 絕無誇張, 我係食咗人一餐啫, 唔足以收買到我既。 其實我除咗鍾意去旅行, 識我既人都知我係超級鍾意食! 就寫第一篇專講食㗎喇! 歡迎再有人請我食野㗎, 不過我個人就有嗰句講嗰句既, 驚就諗過喇! (我係咪以後都冇野食喇?喂呀咁先係堅料吖嘛) 我有野做比較遲去到, 有d師兄姐早去到話有得食既野我就見唔到喇, 因為佢d野keep住refill外都可能會換款㗎, 早去有著數, 食到佢收工為止! 食物::: 食buffet重點梗係食 海鮮類: 既然係海鮮主題buffet就重點介紹海鮮喇 每檯都會有一個海鮮拼盤, 由於我飛埋的都要遲d先到, 所以呢個只係大家食咗一半後既盤, 都幾多款式。 龍蝦: 唔知點解感覺好似同蝦差唔多味,不過都幾好食,可能我真係實在太肚餓, 第一個就鯨吞咗佢。 鮑魚: 雖然細細隻, 但都幾好食。 好滑唔硬一d都唔難咬, 清甜鮑魚味 蜆: 好甜好食 蝦: 好鮮甜好脆 另外出面有任拎海鮮 長腳蟹: 超好食!!! 我係超級鍾意食長腳蟹, 而呢度d蟹真係有質素。味道好新鮮清甜, 恰到既處既海水味更加推高。 肉質好嫩滑, 應該係蒸得啱啱好熟, 有d仲有少少痴殼。 大蝦: 同拼盤嗰d唔同, 呢d係有箝。 搣開個頭都幾多膏, 隻味都幾特別, 唔多似平時食嗰d。 仲有青口翡翠帶子, 都見唔少人攞 魚生類: 全部都幾新鮮, 放響雪櫃有魚生師傅即叫即切, 感覺衞生安全。 有三文魚, 醋鯖魚, 魚, 吞拿魚, 八爪魚, 都算幾多選擇。要特別一提醋鯖魚, 皮好脆, 肉質好好, 好好味。 冷盤類: 沙律ham煙三文魚, 同埋有d小點 特別d既有兩款凍湯。 試咗蟹肉牛油果凍湯, 有放咗蟹肉既小杯仔裝, 都幾得意。 熱食類: 熱盤都唔少, 不過大部份人食buffet都唔多食熱野, 寧願留返d quota呢食海鮮魚生甜品。 其實熱盤都有龍蝦㗎! 仲有唔少海鮮, 唔係得楊州炒飯西炒飯鼓油王炒麵嗰d! 點擊圖片放大 不過真係必試bbq! 師傅即場響餐廳戶外花園燒。 燒乳豬燒菠蘿燒粟米燒雞翼都唔錯, 不過最正係燒羊架, 唔肥但d肉好林好香 甜品類: 一大張甜品長檯加朱古力噴泉, 真係每樣試一舊都夠飽到上頂。甜品d裝飾好靚, 好配合海洋既主題。最吸引梗係出面賣好貴既macaroon 喇, 兩隻都係酸酸甜甜既berries味, 幾有夏日既感覺。 除咗餅房甜品仲有Haagen dazs。 係小杯裝, 唔使排隊出力掘。 今日至少有4隻味: macademia nut, vanilla, strawberry, summer berries and cream, 咩味唔使解釋喇。仲有限量供應新味blueberry, 相信令唔少人心心眼。 另外仲有師傅即埸整雪糕窩夫, 熱辣辣脆卜卜既窩夫加凍冰冰既雪糕, 一個字 正。 點擊圖片放大 +6 水果類: 真係要讚, 個人真係好鍾意食生果, 仲可以消下滯。 呢度生果好多, 連士多啤梨都有, 仲要幾甜。 最正係菠蘿, 超級甜, 明明好飽都忍唔住食好多。 飲品::: 啤酒汽水任飲, 男士應該幾開心 其他::: 環境都舒服, 其他食客都算自律, 食物賣相maintain得ok, 唔會話俾人摷到好核突, 員工服務都唔錯 個人至愛::: 長腳蟹, 小鮑魚, 燒羊架, 燒菠蘿, 三文魚, 醋鯖魚, 菠蘿 黃金海岸酒店聆渢咖啡廳 地址：屯門青山公路1號香港黃金海岸酒店低層地下 電話：2452 8448 網站：http://www.sino-hotels.com/hk/gold-coast/tc/offers/seafood-carnival-dinner-buffet/
