唔知大家鍾唔鍾意食宵夜呢?我好多時出event幫人化妝都會去到好夜先收工,收咗工又肚餓,呢個時候我就會去幫襯呢間位於銅鑼灣嘅居酒屋—燒烤堂 > < 疫情之前,佢哋係開到凌晨兩點先收舖㗎,所以我宵夜/晚餐都好鍾意過去佢哋嗰度食燒烤,同朋友飲下啤酒吹下水,都係收工嘅小確幸嚟嘅~ 燒烤堂其實喺港九都有好幾間分店,而我最常去嘅就係銅鑼灣分店~ 每晚去到都係超級多人,有時到10點都仲要等位~但係佢哋每一串嘅串燒都非常好食,所以都值得等一陣間嘅!佢哋有一款鹽燒雞皮,唔似坊間嗰啲細細舊癡埋一齊燒,佢哋真係一塊雞皮大大塊燒到脆卜卜,冇任何油脂,好似薯片咁勁特別! 我個人嚟講最鍾意食佢嘅雞皮墨魚滑,簿脆嘅雞皮包埋爽滑嘅墨魚滑,超級有口感又彈牙夠味~仲有佢哋嘅燒牛舌腩都好正,爽口得嚟又有汁~加埋佢哋粒粒分明嘅鰻魚炒飯,好滿足,真係強烈推薦大家試下!!! 其實喺燒烤堂入面隨便點一串串燒都非常之好食,而且價錢都唔算太貴,加上全部都係新鮮燒好,好入味!同埋佢哋都會有好多創意嘅燒烤,例如牛油果豚肉卷,鹽燒豚肉荔枝卷等,佢會用唔同嘅食材Mix and Match,但又唔會好伏,反而令到味道好有層次~ 另外,佢哋經常做緊啤酒買一送一嘅優惠,啤酒加串燒,冇得頂^^!唔怪得咁多人收工都過去食啦,入面氣氛都好好,仲會有吧枱添,真係好有日式居酒屋嘅感覺! 總結嚟講,強烈推薦呢間燒烤堂居酒屋俾大家,特別係鍾意食串燒嘅朋友,真係要去試吓!喺下面俾埋個Menu你哋參考吓啦~