四季啱用唇部護理！ 唇部護理係好多女生都會忽略嘅一個步驟，即使皮膚幾靚都好，如果個嘴乾到甩皮，都會影響儀容！ 因為嘴唇無皮脂膜保護，所以水分容易蒸發走，令唇部容易乾燥。 由於春天比較大風，夏天又經常會留喺冷氣地方，秋冬季天氣又乾燥，所以唇部護理係一年四季都要做架！ 粉嫩嘴唇tips： 千祈唔好用手撕去唇上嘅皮，除咗會令雙唇顏色更暗沉外，仲有機會整傷個嘴，導致疼痛、流血，甚至會感染細菌。如果唇部乾裂，可以先用熱毛巾敷唇3-5分鐘左右，再用柔軟嘅刷或者毛巾輕力擦走死皮，之後搽上潤唇膏。 唔好舔唇，呢個動作只可以為唇部帶來短暫嘅濕潤，而當口水被蒸發時會同時帶走唇部肌膚嘅水分，令嘴唇越來越乾，甚至會令唇部周圍嘅肌膚變得粗糙。 沖涼時喺嘴唇搽一層厚厚嘅潤唇膏，因為溫度可以加速血液循環，令護唇產品更易吸收。 每星期做一次唇部去角質，建議沖涼之後做。同樣地用熱毛巾敷唇幾分鐘，再擦走死皮，之後可使用護唇膜。 蜜糖具有強效嘅保濕功效，每晚瞓覺之前，用化妝棉或棉花棒沾一啲蜜糖搽喺唇上，然後用手指輕輕按摩，促進血液循環，令嘴唇滋養。如果唇部覺得好乾燥，可以將蜜糖敷喺嘴唇20分鐘再洗走。 隨身帶備潤唇膏，最好係含有維他命E等滋潤成分。 多飲水，尤其係長期坐冷氣房工作嘅你。記住唔好口渴先去飲水，應該以「少喝多次」嘅飲法最為理想。 嘴唇肌膚容易吸收紫外線，所以無論任何季節，建議選用有防曬功能嘅潤唇產品。 用於眼部肌膚嘅產品同樣適用於唇部肌膚，如果唇部周圍嘅肌膚粗糙，不妨搽少少眼霜，達致修護效果。 平時食完嘢抹嘴唔好用紙巾用力咁抹，應該輕輕咁印，避免加深唇紋，甚至令唇部受傷。 化過唇妝後，可用成分溫和嘅唇部卸妝液落妝，避免使用清潔力太強嘅產品刺激嘴唇。 如果嘴唇乾裂，要避免食辛辣等刺激性食物，防止情況惡化。
