2017/09/09 天氣幾好！天朗氣清 係好第四日啦，就係去夜間主題樂園－幻多奇(Fantasea)，所以今日朝早無行程，今日唯一嘅行程呢就係夜晚就係去食自助餐同埋睇幻多奇，咁黎咗幾日巴東沙灘都未真正喺個沙灘度遊過水 ，咁個朝早同下晝都係冇嘢做嘅， 一朝早我就出咗去行街同埋坐沙灘，睇人玩 降落傘水上單車下啲鬼仔鬼妹啱曬太陽，諗下野咁樣！咁就好好咁過咗一個朝早啦，咁今日係唔係平平無奇㗎喎！咁諗住走嗰陣呢，有個沙灘仔(beach boy佢就係做遊客生意租水上單車俾人玩)同佢吹左陣水，佢就話不如你下晝過嚟喇，你下晝過嚟我帶你去玩水上電單車！跟住我就應承咗佢啦，就返屋企啦，就同啱啱瞓醒嘅弟弟就去食個午餐去左食burger king 跟住行多陣街！ 晏晝我真係去咗游水，芭東個海灘都幾大浪，不過又唔算好深水，玩浪同游水都可以，同埋佢分幾個區嘅，要分返畀水上活動嘅區域，同游水嘅區域，同埋係冇救生員可能我見唔到啦！ 其實我係諗住真係搵你個beach boy，但係個沙灘好大，我真係搵唔到佢，搵咗好耐，來回幾次，最尾諗住游完走嘅時候，就俾佢見到了！叫我畀錢玩呢我就真係唔會玩我真係都冇咩興趣，跟住就坐喺佢嗰竇到同佢吹下水，佢嗰竇都其實都係一把沙灘傘下面有幾長張櫈有張枱咁樣，等左陣佢就帶咗我出去玩個水上電單車啦！ 個水上電單車真係好刺激， 鐘意風馳電掣嘅一定要試下！玩完就同佢交換左facebook，佢就約咗我夜晚去飲嘢喎， 咁有地膽帶我去飲嘢㗎，梗係應承佢啦！ 留返去沖涼換衫著靚靚咁就去睇幻多奇同食自助餐， 因為我上網book㗎，咁就無車接，如果你想去睇， 去到布吉啲一日團到先book好啲，有埋車接， 我冇車接要撘的士到撘左400B成舊水港紙來回200㗎啦，去到就食自助餐，泰國嘅助餐超服，呢個係要畀錢食㗎，但係都係勁難食，咁個公園都好大，咁我哋好早到咗，跟住又好快食完個好難食嘅自助餐，咁仲有成個幾鐘頭喺嗰度轉轉轉轉轉， 周圍行下睇下無無聊聊影下相，不過佢呢到有幾隻大笨象，可以 俾遊客騎下大象，買啲蕉餵下大象同大象影下相，佢啲景點影相幾靚！啲建築物都幾特色，在入面好多攤位遊戲玩，有啲商場行下買手信㗎，咁夠鐘就可以入場啦，佢唔比帶電話入去，開場啦 ！ 點擊圖片放大 +5 犀利啦 九成時間都唔知佢做乜嘢㗎因為佢講泰文同埋少少英文，總之係講緊一個故仔啦，佢就魔術雜技馬戲話劇舞蹈唱歌都有啲，不過就有啲驚喜位嚟嘅，可能我係鍾意刺激呀，唔係偏文靜嗰啲人啦， 個show有會覺得有少少悶，十分我畀五分呀，唔會太推介都未睇過咁多做乜嘢可以試下！ 睇完就去搵咗個泰仔啦，點知係去唔成嘅，點解遲啲話你知！跟住最後諗住又落酒吧啦，點知有勁多人禮拜六晚，要坐到出門口，搵開嗰個女仔又冇返工，自己最後坐沙灘算數！
