今朝六點半，我仲喺張床度打緊哈欠，個手機就「叮叮叮」響個不停。打開「五十而知天命」個 WhatsApp 群組，只見幾個退咗休嘅阿叔阿伯喺度轉發一段文字，字字血淚，好似世界末日臨到咁!其中一個老友記咁講：「你有沒有試過，明明只是隨口跟朋友聊起某件商品，轉頭手機就彈出相關廣告? 你日常的對話，其實極有可能正被默默傳送到 Google 伺服器！」群組入面班老友記即刻陷入極度恐慌！差不多要用錫紙包住部電話，將部機浸落水，甚至要報差館畀人竊聽!或者呢啲辦妥退休手續嘅老人家，以前未退休嗰陣，總覺得自己係社會棟樑，背負住家庭甚至香港經濟嘅秘密。我睇住個螢幕，摸一摸自己個頭，真係好想發個語音訊息去開解佢哋：「各位兄弟，冷靜少少啦！出現咗智能助理之後，電話的而且確會聽你講嘢，隨時候命。你覺得智能助理，就係為咗竊聽你？」你試吓想像一下，喺Google嘅總部，有一日個高級工程師好緊張咁向老細報告：「老細！我哋嘅 AI 成功竊聽咗香港一個 50 幾歲退休男人 24 小時！」個老細即刻眼都大埋：「有咩重大情報？佢係咪暗中策劃緊幾百億嘅上市併購案？」工程師倒吸一口涼氣：「報告老細，冇！佢今日由朝到晚，講得最多嘅兩句話，第一句係：『老婆，我膝頭啲風濕痛又發作！』第二句係：『Ok Google，聽日落唔落雨？』」如果跟住第二日，你部手機畫面上就跳出個「保養膝頭關節軟骨素」或者「自動開關雨傘」嘅廣告——各位，呢啲就當係「人道關懷」算了！如果我係個 AI，連續聽咗三日廢話，我唔單止想自毀，我仲會覺得呢個阿叔實在太可憐，忍唔住要派啲生活指引畀佢呀！你有冇發現一個好奇妙嘅現象？我哋成日驚科技偷走我哋嘅隱私，但事實係，我哋花喺手機上面嘅時間，遠遠多過同真實嘅人溝通。因為環顧四週，最千依百順嘅係部手機。你叫佢「Ok Google」，佢喺1秒之內，即刻彈出嚟幫你。呢個世界真係進步得好快，好多事情唯有睇開啲，如果真係有人 24 小時竊聽你，代表你仲有被聽嘅價值。最慘嘅唔係被人竊聽，係你打開通訊錄，由頭到尾滑一遍，發現除了Google之外，根本冇一個人願意聽你講半句說話。
