最近聽到班老友記講，WhatsApp 終於肯推行「用戶名（Username）」功能。即係好似 IG 咁，俾個用戶名就得。以後去旅行 book 位、叫 Uber 聯絡司機，唔使下下大方到將自己個 +852 電話號碼雙手奉獻畀陌生人。除咗有私隱、可以限制邊啲人搵到你之外，最緊要係乜？唔使錢，但要「鬥快搶」！💪💪💪面對科技，我一向態度都係開放接受。當然，老友記群組入面永遠有另一種聲音，有些老友第一時間潑冷水：「玩呢啲嘢做乜？依家科技咁發達，用咗用戶名，會唔會更容易俾人呃、更多騙案？等陣連棺材本都冇埋，我死都唔用！」簡直係將網路世界當成《無家可歸的小孩》咁危險，嚇到個心卜卜跳。當晚，我同老婆喺客廳一人一部電話。老婆問:「喂，你諗定用咩名未啊？」「使乜諗，我咪用返我英文名囉！」我好淡定。老婆用一種睇「外星生物」嘅眼神望住我：「你個英文名？全香港、全世界有幾多個同名同姓啊？你個腦退咗休，係咪連智商都退埋休啊？系統實話你 『此用戶名已被佔用』 啊！」我一諗，又真係。回想當年初初有電腦，去 Yahoo、Gmail 或者 Outlook 開 account，我哋呢代人最鍾意用「傳統大路名」，一係就英文名加生日，例如 @LeungBing_1963。但係咁樣一睇，咪即係話俾全世界聽：「喂！我今年幾多歲喇！快啲嚟呃我長者生果金啦！」***改名四大流派退咗休就係咁樣，勝在時間足夠。為咗呢個用戶名，我同老婆上網刨策略，發現改名主要分咗以下四大流派，每派都有背後嘅盤算：第一類：Identity（身份認同） 即係直接話畀人聽你係邊個、代表邊度。好似最正宗嘅 @Peter_Pan、@Tom_Lee，一睇就知係乜水。我哋呢代人最缺乏安全感，改個有身份嘅名，行出嚟個胸都挺直啲。第二類：Attitude（人生態度） 呢類多數係後生仔用，充滿不屑同個性，例如 @bad_boy_2026、@don_t_look_at_me。但我哋退休人士都可以有態度㗎，好似我老友想改個 @forever_young_hk，聽落幾有年青氣息。人哋一見到你個名，唔敢亂發長輩圖煩你。第三類：專利名（商業轉售價值） 呢班人最具有香港人嘅「搵錢精神」。有老友喺群組煽風點火：「喂，正名好值錢㗎！如果我搶到個 @SpaceX、@Tesla 或者 @Apple，到時 Elon Musk 想要返，話唔定可以轉售賣返幾十萬，直頭可以好似半澤直樹咁『百倍奉還』大發達啦！」第四類：偶像名（情懷投射） 將自己最迷嘅偶像塞入個名度。好似@kimura(木村)，@brucelee 要威畀班老友睇。正當我哋兩公婆嚴陣以待，我打個長途電話俾喺英國讀緊書嘅阿女。「女啊！快啲準備上網搶 WhatsApp username 啊！遲咗好嘢俾人執晒喇！老豆幫你諗埋，改個 @super_girl 點睇？」阿女喺電話嗰頭傳嚟一聲長長嘅嘆氣:「老豆……依家邊有人用 WhatsApp 㗎？我哋全部用 IG 啦。同埋，一個 generic 嘅名有咩好搶？你改個 @super_dad，人哋仲以為你係賣機械人廣告啊!」呢個就係代溝。後生仔追求嘅係「獨特性」，最好個名好似密碼一樣，得佢班死黨知。而我哋呢代人呢？我哋習慣咗傳統，追求嘅係「存在感」。最後，我都成功登記咗一個自己好鍾意、帶點偶像情懷嘅名。老婆呢？佢竟然更勝一籌，成功攞到佢嘅心水創意名！依家喺沙發上邊好似贏咗奧運金牌咁，不斷喺佢啲「聚餐群組」入面張揚。我睇住佢個得意樣，忽然覺得，呢場戲簡直係《結婚大作戰》嘅退休版。搶唔搶到最正嘅名，其實一啲都唔重要。最重要嘅係，退咗休之後，身邊仲有一個人，願意陪你一齊癲、一齊做埋啲喺後生仔眼中「好無聊、好師奶、好阿伯」嘅嘢。😊
