2024 年 9 月 30 日，我哋嚟到 Greenwich。呢個小鎮因為 GMT（Greenwich Mean Time，格林威治標準時間） 而聞名全球。19 世紀，英國大航海時代需要一個「共同時間」去校正航行、繪圖同國際通訊，於是就以 Greenwich 天文台嘅本初子午線為基準。我哋差唔多 GMT 09:30 抵達 Greenwich Park。講起嚟幾有趣——平時睇手錶時間，最多係「香港時間」、「倫敦時間」，但去到呢個地方，講「GMT 幾點幾分」就好似格外合理。入到 Greenwich Park，迎面就係一條被大樹遮蔭嘅小徑。秋天嘅空氣帶點潮濕，地上鋪滿黃葉同一粒粒七葉樹掉下來的果實，好似鋪咗層軟墊。Jogger 從旁邊擦身而過，遊人散步聊天，氣氛悠閒得嚟帶點英倫詩意。 沿林蔭小徑一路向上，愈行愈高，終於見到 Royal Observatory （格林威治天文台）嘅紅磚圍牆。門口掛住一個 24 小時嘅大鐘，底下仲展示住「英制長度標準」。 走到觀景廣場，排隊影「本初子午線」嘅人絡繹不絕。一腳踏東、一腳踏西，好多人擺甫士自拍。我冇加入排隊，只係靜靜望住呢個「零點」。 由天文台外圍俯瞰，整個 National Maritime Museum （國家海事博物館）與 Queen’s House （王后宮）齊整排列喺腳下，白色建築像棋盤咁展開，下山後一定要看看。再向遠處睇，泰晤士河一個大彎，蜿蜒而過，河對岸就係Canary Wharf(金絲雀碼頭)嘅摩天大樓。歷史、自然、現代，就咁重疊喺同一幅畫面入面。嗰一刻，陰天反而令景象更具層次——灰雲底下透出少少陽光，整個倫敦像加咗濾鏡。 下山途中，回望小山丘上的天文台，有點煙雨濛濛。發現草坡上人影點點，好似一個天然舞台。由遠到近，綠地、紅磚、白色石柱，層次分明，畫面靜謐卻壯觀。 對我嚟講，Greenwich 唔單止係 GMT 嘅起點，更係一個讓心情 reset 嘅地方——在這裡，時間唔再係催促趕路，而係要慢慢享受。
