雖然出發歐遊前，已經食左3餐大閘蟹宴，但，當你係facebook不停見到朋友同d廣告係咁post蟹膏相既時候，真係恨不得即刻飛翻香港大擦一餐！ 心癢難耐左一個星期，終於俾我無意間搵到有野生荷蘭大閘蟹供應既中國超市！諗住今次實食到啦，帶住超期待既心情用超爛既普通話問個老板點賣，點知已經無晒貨！ 原來新鮮海產只限星期五先有得賣，先到先得！（明明個日就係星期五！不過下午3點左右之麻！）吃貨當然唔會為呢d小問題而放棄！一個星期者，眨下眼就過，反而要諗下應該點蒸，皆因我住間屋個廚房太簡陋。 過左一星期，終於俾我如願見到大閘蟹喇!！ But, but, but.....點解呢度既大閘蟹無蠅綁住既！!個老板娘純熟咁一手拿起D蟹，就咁掉落個膠袋俾我，睇到我眼都突埋！ 晴天霹靂呀！ 作為一個弱質既港女，我真係未掂過任何識郁既海鮮架！而且係網上睇過咁多人煮海鮮倒瀉籮蟹既樣。我好惶恐咁係咁問個老板娘應該點煮，問到佢眼都反白埋然後漠視我。佢既答案就係，煲滾水，掉落去蒸15分鐘，完 返到屋企望住袋蟹，下個煲，諗住whatsapp問下d姊妹，人妻朋友，經驗廚師，睇下有咩計，但得黎既答案都係“下，咁攪笑”，‘下，咁你點呀’，“嘩，你不如放生啦！” 真係想俾反眼icon佢地，無計啦，人在他鄉，係時候要發揮小宇宙。係同蟹兄妹對望左5分鐘之後，我決定原膠袋拎去生蒸，最多都係成為第一個為左食大閘蟹中膠毒死既人者。 而蒸出黎既大閘蟹真係超好食呀!!！！!一打開，不得了，個囊比食陽澄湖，太湖既白好多，而且爆晒膏，D膏仲甘香軟滑鮮甜，真係大大大滿足呀！ 價錢仲要唔貴，3.5至4両size既蟹，平均唔洗40蚊港紙（4.5 euro)一隻， 仲要係野生荷蘭大閘蟹！！
