一大早就起身打算去參觀果個巴黎地下墓穴 - Catacombes de Paris，間野係Denfert Rochereaus姐係尋日轉車果個站。10點鐘開於是我地10點半去到諗住都算早啦，點知已經發現勁多人排隊仲要已經環繞左間野附近既公園1圈，去番入口個位置。雖然感覺中伏但係知道之後唔會再有時間黎，所以我地都照排，諗住排1,2個鐘應該就搞店啦。 頭2個鐘都算郁得快，我地仲去左附近Paul到買左個法包3文治黎食。點知去到大約12點1點就開始pk，條隊冇郁過咁滯。去到2點開始覺得唔對路個rate太慢，所以就去左入口到睇，先發現原來每個鐘都會有d買左貴d既優先預約飛既人會入左去睇先。由於個館限制左同時只可以有around 200個人係入面參觀，變相如果每個鐘都優先放左為數有成30-40既買左預約飛既人入去睇先既話，我地就要額外再等耐d。 排隊排到崩潰.... 點解可以有咁多人~_~ 本身我地plan左行程係大約12點睇完個館然後就過西堤島果邊睇聖母院同去東東話想去既fresh food market，但係我地2點都未入到去，果陣東東已經好唔耐煩想走，但係我知道走左之後唔會再有機會黎睇，同埋已經排左4個鐘覺得就咁走左好蝕，最後堅持排落去。終於，係3點半既時候終於入到去。屌結論我地排左成5個幾鐘，依d咁痴線既野真係唔會有下次。中間仲要發生左小插曲，我地就排到果陣竟然有人想打我地尖。由於我地前後附近既人都係已經排左4-5個鐘，我地前幾個d人甚至係10點就已經黎差到差唔多排左6個鐘，佢地緊係接受唔到俾人打尖，於是大家就齊心協力咁屌走左佢.... O:) 入依個館成人飛12 euro，學生飛都只係平得2 euro，收費10 euro。雖然我覺得偏貴，但係我真係好想參觀依個館，而且排左咁耐，唔通走咩，於是就入左去開始我地等左5個鐘既參觀旅程~ 排左5個鐘先買到既入場卷 行左1條好長既旋轉樓梯後就落左去地牢既展廳。依個Museum前半段都係由唔同既展廳所組成，裡面show左依個未變人骨墓穴前既礦道既歷史同之後變成墓穴既原因同過程，中間由好多條又長又昏暗既地下通道連接住。其實我行依d通道果陣個人已經好興奮，首先係因為本身小弟就好鐘意依d咁有神秘又懸疑氣氛既地方，其次就係依個墓穴就係套戲"As above so below"既取景地方，依套戲正正就係講巴黎地下墓穴，我沿途睇到好多熟悉既場景 :P 所以我行依d通道果陣都已經影左好多相。 就係依條通向死人世界既樓梯~ 依幅圖講左由礦坑變地下墓穴既原因~ 又長又昏暗既地下通道 O:) 途中有好多依度睇到又去唔到既通道，成件事好有神秘感 經過哂d展廳之後，穿過一個印有古怪文字既大門，終於就到擺滿人骨既地方。現場睇既震憾程度同睇相真係差好遠，有好多好多好多好多既人骨，多到真係相信果段時間既巴黎係真係死左好多人。1個人只係得2條大脾骨，但係依到d牆閒閒地都幾百條大脾骨，仲要依到沿路有幾百牆，真係唔敢想像到底有幾多個人係依度=_= 但係依個Museum其實又好吊詭，有時會發現d人骨排成d特別既形狀，就好似等你冇咁悶所以排得得意d俾你地睇黎開心下咁，成件事真係好古惑。最後我地行左大約個幾鐘，就上番條好長既旋轉樓梯番地面。 果度大門外邊既文字 由大脾骨做base起既牆 其實真係好多人骨.... 沿路都係密密麻麻 仲要用人骨黎排圖案囉 shocked 搭到去西堤島果邊已經係大約1715既事，未食野既我地極肚餓，於是就咁行經聖母院影左幾張相就經天橋去左聖路易島食好似好出名既Berthillon雪糕。價錢其實唔算貴，4.5 euro 2球，我要左Martini Tonic味同Cacao味，佢d雪糕味道好濃，感覺好似食緊雪芭多過雪糕，係幾好食既。 就咁行過影左張相既聖母院 Berthillon提供既雪糕味道同價錢 我點左既Martini Tonic味同Cacao味 食完雪糕之後再過天橋去左瑪萊區果邊食野。本身諗住食果間L'as du Fallafel原來係星期5晚同星期6休息，摸門釘既我地唯有搵下附近有咩好食。好在果間Fallafel所在既街都算係1條食街，沿街都有好多小食鋪，而我最後係街尾仲搵到間有好多人包括local同tourist都排隊食既crepe鋪頭 - La Droguerie，直覺覺得好食既我2話不說就決定食依間。我要左個咸既Crepe，個名係Oriential裡面包有海量既芝士、雞、椒、onion、蕃茄同檻欖。而東東就要左個甜既Crepe，裡面加左焦糖牛油海鹽醬。總結係依間野非常之好食，而且整Crepe果個師傅都幾funny，係你面前整緊果陣會講好多野 (雖然係法文我都聽唔明....)，睇佢整同食既過程都係1個享受黎，而且價錢都唔算貴，我果款好足料都只係6 euro，覺得可以瘋狂encore！ 就係依間Crepe鋪頭啦！ 佢既餐牌 東東叫既甜味Crepe 我要既咸味Crepe，睇下佢d芝士多到！ 雖然個crepe好大份，但係我都仲係覺得唔太飽。難得係法國M記發現到1個只係賣4.95 euro叫Mcfirst既餐，我同東東最後1人食左1份當晚餐，就番左airbnb完左今日既行程了。 感覺好抵食既m記餐，依次之前未試過係歐洲既M記用<5euro買到1個完整既m記餐
