係CDG究極眼訓同開始擔心會俾人搶野既情況之下，精神好緊張咁走左去train station準備搭車去我地間airbnb附近既Mairie de Montrouge站。好彩既係我地唔駛係臭名遠播既Gare du Nord到轉車，而係搭RER B線到安全區域既Denfert Rochereau站轉4號線，總站就係我地要去既車站。 係CDG搭MTR出市區不論去邊都係10 euro，本身諗住係售票機到買飛，點知發現只收coins唔收紙幣，於是就去左櫃台買 (之後發現原來有d機收紙幣有d機唔收，本身好驚之後買day ticket會唔夠coins買)。順利地大約搭左1個鐘之後就到左我地要去既終點，沿途都冇乜古怪野發生，古怪人都唔覺有。本身黎之前見d人話搭地鐵開始已經小心爬手，我仲好不安左望右望長期處於戰鬥狀態，睇黎可能治安其實冇想像中咁差 (?) 落車之後比想像中行得耐要成15分鐘先到住果到。本身個host話會親自俾key我地，但係前晚佢wtapps我話佢爸爸入左醫院佢要即刻番屋企，所以將條key擺底左係佢間屋對面既髮型屋到，話我入到去就咁講佢個名就會拎到key。本身講好左check in時間係10點，但係由於我地係機場等到頂唔順既關係，我地9點就到左打算搏下可唔可以早d check in，點知去到先發現間髮型屋開10點..... 同個host溝通左之後，我地就去左附近間叫Intermarché既超市到hea時間，大約10點就番番去間髮型屋。題外話，依間超市都幾大幾多野行，d野比德國貴d但係種類算多，而且個價錢牌係電子而唔係用紙印出黎，感覺好新鮮 :P d價錢牌係用電子顯示器show出黎而唔係用紙印出黎架！ 番到髮型屋入去問果個職員，第1句竟然態度極差咁No English同only French然後想趕我地走，完全係我意料之外。係我差d就想sd wtapps問個host發生咩事果陣我show左同個host既wtapps記錄俾佢睇，與此同時係鋪裡面既1個seems that識英文既女客人都有幫手問下我地想點。本身佢以為我地係想問地址，擾讓1輪個女客人同個職員先明我地想點，然後就咁俾左條key我咩都冇講就行開左=_= 其實果陣有d不爽，明明我都冇錯又唔係我俾條key你做乜要黑我面，不過算啦。 係樓下開大門上樓都搞左勁耐，我地以為要用key黎開樓下大門點知原來係密碼鎖黎 (好心就唔好俾條插得入樓下大門但係開唔到既key我啦)，再開多1度building鎖同屋企大門鎖先入到屋。我地今次間airbnb係棟樓既最高層，而且係最邊果到。棟樓其實只係3層樓高所以我地都只係要行3層，但係唔夠訓真係令到人好累=_=。入到屋之後，好彩整體都同想像中差唔多，係張檯太細同冇乜位擺野，不過打開左佢個3層掠衫架擺野之後，overall都ok既。個toilet反而比想像中好，只係佢係用儲水式熱水爐，意味住如果沖涼太耐既話就會冇熱水。另外想講係佢個wifi password真係世界級，佢寫左係張紙到俾我地，但係有成20-30個字..... 佢d字又唔係靚我入左5次先入到個wifi=_= 搞左我成15分鐘。急速沖涼梳洗完之後，我地就訓左lu。 最後我地3點半到就訓醒落街行。由於我地諗住聽日先買5 day ticket既關係，變相今日我地冇車飛，只可以去步行距離去到既地方，而且我地本身都累，所以今日就冇安排行程，就咁行去有dd遠既Carrefour到望下有咩買，順便望下沿途附近有d咩鋪頭。間Carrefour比我地想像中細，而且價錢亦算貴，於是我地就決定番番去bnb附近既Intermarché買野食。 我地係巴黎既15區，d樓好有香港既感覺！我係Essen未見過依款樓=_= 沿途行過見到既牆磚見有d得意就影底左~ 途中我地發現到間好吸引既土耳其凍肉鋪，間野有賣即整燒雞而且係10 euro 2隻。我同東東全日其實都未食過野，所以好快就決定左1人1隻然後就即刻番bnb買餐。只可以講，隻雞真係好香好好食，而且仲要好夠份量。之後果幾日發現其實法國d街好多依d賣燒雞既鋪頭，不過5 euro 1隻好似係見過算平既價黎。 我愛燒雞 <3 係有dd咸不過都冇上次係Fruh食緊豬手咁咸，所以我覺得依隻雞好ok 食完之後我地先再去番超市買野。間超市有好多唔同種類既包裝好既蛋糕，我買左1大條朱古力味黎做早餐，而東東就買左1大袋獨立包裝既貝殼蛋糕。除此之外，仲俾我搵到Mars既朱古力條雪糕！作為Mars終實fans既我即刻就買左1盒食，果然係真係好好食！講真我覺得仲吸引過普通既Mars朱古力棒，如果德國有得賣我實日日買黎食 <3。好出名既法國Perrier水係依度買都只係0.76 1L，仲要係檸檬味，於是我都買左1支黎飲，係好飲既，氣既量唔算多，冇甜味，好清新既檸檬味，雖然同德國d有氣水比算貴但係真係好飲太多，唔怪得d港女咁鐘意飲啦 :D 極好食既Mars朱古力條雪糕！ 港女Perrier水，其實又真係幾好飲 去完超市買野之後今日既行程就已經完左。唉人真係開始老，通左晚頂之後訓多多都好似補唔番咁。原意係唔想浪費1晚既住宿錢所以尋晚先冇book到住，但係其實今日全日都拎左黎訓覺其實都係浪費左=_= 下次都係唔好咁白痴辛苦自己訓機場~0~
