約咗朋友嚟呢間高級日本料理店食嘢，睇完menu覺得佢哋嘅嵐山二人前套餐($899)最抵食，除咗有齊前菜、沙律、甜品呢啲基本嘢，仲有小食、刺身、壽司、鍋物同烏冬。種類夠多，相當豐富。 前菜前菜有漬物三點同沙律可以兩個人share食。3款漬物分別係蘿蔔、牛蒡同青瓜，漬物醃得入味，口感清爽，最特別嘅係青瓜，面頭有啲味噌，鹹香惹味。沙律就有蟹籽、蟹柳、粟米、蕃茄等配料，加埋酸醋醬汁，夠晒開胃。刺身四點刺身有4款，分別係拖羅、油甘魚、三文魚各兩切同甜蝦4隻。魚生好新鮮，而且件件厚切，食落非常滿足，尤其係拖羅，夠哂肥美，甜蝦味道都好鮮甜。 壽司拼盤壽司方面就有日本海膽、金目鯛、真鯛、帆立貝、赤身、深海池魚等貴價魚生每款1件，仲有6件拖羅蓉小卷。海膽好鮮甜，口感幼滑creamy。金目鯛經過火炙，食落特別香。帆立貝質感水嫩，厚肉爽彈。佢哋嘅壽司飯亦係非常特別，用上赤醋，所以呈啡色。 食完冷盤就到熱食，先嚟嘅係兩款小食。山賊汁燒安格斯牛柳串牛肉味好濃郁，食落帶啲辣，非常惹味。唐揚薩摩雞翼雞翼炸到金黃香脆，但一啲都唔油，雞肉仲係好嫩滑。 廣島蠔味噌菜鍋主菜就有熱辣辣嘅鍋物，大大隻水嫩飽滿嘅廣島蠔，配上味噌湯底同娃娃菜、豆腐、菇菌等蔬菜，食落夠哂暖胃。 黑咖喱湯豬軟骨稻庭烏冬黑咖喱配搭腍嫩豬軟骨同煙韌稻庭烏冬，味道香濃。甜品飯後甜品就有雪米糍。 。。嵐山日本料理 (尖沙咀)尖沙咀棉登徑11號地舖。。#手機食先 #日本 #吃貨 #相機食先 #美食 #食 #食好西 #香港 #香港美食 #香港探店 #香港必食 #香港餐廳 #香港旅遊 #旅遊 #必食 #bookatable #香港好去處 #抵食 #openrice #hkfoodie #hkfoodblog #hkfood #尖沙咀 #壽司 #日本 #日本菜 #嵐山日本料理 #刺身 #海膽 #串燒
