開始入冬最岩約埋朋友去食燒肉,黎咗銅鑼灣呢間牛舞食放題,特別在於可以同一時間食到燒肉同壽喜燒。而且臨近聖誕仲有優惠,會送聖誕拼盤同聖誕禮品包,非常有節日氣氛,酒類放題亦都半價。我哋揀咗食日本薩摩和牛放題,可以任食124種食物,包括5款鹿兒島薩摩和牛,好似牛肋肉、牛赤肉、牛肋條同和牛粒咁。 亦都可以食到其他唔同種類嘅豬、牛肉同蔬菜,當然唔少得仲有甲羅燒、虎蝦、帆立貝、蠔、多春魚等海鮮。 先講薩摩和牛,質素唔錯,油花分佈平均,厚薄適中,輕輕一燒就食得,唔同部位嘅油脂比例都唔同,但肉質同樣軟腍,而且肉味香濃,唔會太過油膩。 海鮮方面都落足本,好似原個甲羅燒咁,蟹膏加入蛋黃撈勻一齊燒,蟹香濃郁鮮味,非常邪惡。喺呢到食燒肉另一個特點就係食到膩嘅時候又可以叫d壽喜燒肉類同夾d蔬菜食吓壽喜燒,非常過癮。 我哋揀嘅日本薩摩和牛放題,就可以食到薩摩牛牛後腿肉薄切,薄薄一片輕輕喺壽喜燒湯汁入面淥一淥就食得,肉質腍嫩,吸收哂湯汁嘅味道,點埋蛋汁食肉味就更加香口濃郁。 本身放題會送嘅燒肉拼盤,聖誕優惠期間會變身成非常精緻嘅聖誕拼盤,將牛肉堆成聖誕樹嘅形狀,打卡呃like一流。入面有多款薩摩牛,好似特上西冷、牛肩胛肉、牛腹脅肉、牛胸腹肉,更加會有稀少部位同用黎食壽喜燒嘅牛肩胛,款款都好好食,食薩摩和牛食到飽,超級滿足。 食飽仲可以食埋日本雪糕、雪條、生果同其他甜品,非常豐富。 。。牛舞日本燒肉‧涮涮鍋放題 (利舞臺廣場) (銅鑼灣)銅鑼灣波斯富街99號利舞臺廣場8樓A號舖。。