同朋友黎咗呢間隱世西餐廳，雖然係樓上鋪地方唔算大，但係環境都算舒適，有sofa位之餘又有戶外露台座位。 白酒牛油煮大蜆伴酸種多士 $158白酒大蜆份量都唔少，蜆肉飽滿鮮甜。仲有兩塊烘到脆卜卜嘅牛油蒜蓉酸種多士，點佢個香濃creamy嘅白酒牛油汁食就岩哂。 慢煮24小時美國安格斯牛肋骨伴乾蔥紅酒燒汁 $298牛肋骨火候控制得岩岩好，肉中間仲呈粉紅色，肉質腍嫩，肉汁豐富，肋骨附近亦都有好多肉可以食。配菜方面仲有烤大蒜同蘿蔔仔。 大蒜青蘋果意大利飯伴香料烤慢煮豬腩肉 $158意大利飯口感屬於偏硬果種，淡淡嘅蒜味同青蘋果味，配上香濃嘅芝士忌廉醬汁、烤豬腩肉同粒粒合桃果仁，口感味道層次豐富。 芝麻豆腐 $52朋友叫咗杯芝麻豆腐沙冰，芝麻味好香濃，好似食緊芝麻糊咁，仲有淡淡嘅豆腐香。雜莓乳酪沙冰 $52我就叫咗杯雜莓乳酪沙冰，味道酸酸甜甜，夠哂解渴。 。。Cafe Zense (銅鑼灣)銅鑼灣謝斐道460-462號楊耀熾商業大廈4樓。。
