心血來潮想食燒肉，呢間喺旺角嘅大眾燒肉酒場出咗名性價比高，用親民嘅價錢就可以食到靚和牛。除咗和牛亦都有好多唔同種類嘅燒肉，最平幾十蚊就有一碟，非常抵食。火炙自信作和牛 $88先上嘅係呢款火炙和牛，店員會用火槍即席為客人炙燒和牛片，再包住紫菜、紫蘇葉、洋蔥、沙律醬等配料上碟。和牛燒到岩岩熟，肉質非常腍嫩，因為入面卷住好多配料，咬落去除咗肉香，仲有紫蘇葉、洋蔥等嘅清香，口感味道層次都好豐富。免治和牛多士 $88呢款和牛多士用份量十足嘅免治和牛做成吉列和牛漢堡，漢堡肉厚juicy，用烘到金黃香脆嘅多士夾住吉列和牛漢堡，加埋香濃黑松露，夠漸哂滋味。汁燒千本筋 $48屬於牛嘅稀有部位，肉嘅口感偏向實淨，肉味濃郁。果漬牛肋肉 $58醃製過嘅牛肋肉入口帶淡淡嘅果香同甜味，牛肋肉粒好腍身。 薄切牛舌 $28牛舌只需要$28非常抵食，薄薄一片但口感依然非常爽嫩。和牛霜降・赤身盛 $88油脂分布平均，但因為係赤身，食落有和牛嘅腍嫩口感但又唔會太肥膩。和牛三角腩 $98至於呢款和牛三角腩就比赤身更加多油花，食落入口即融，油香係口腔入面爆發。和牛沙巴當 $98另外呢款沙巴當，油花多之餘，肉味亦都好香濃，大大塊放入口非常滿足。 紫菜月見丼 $28食燒肉當然要送飯食，叫咗個月見丼，面頭鋪滿紫菜同隻靚靚生雞蛋，加埋燒肉食就一流。黑糖菠蘿 x2 $18@甜品叫咗兩串黑糖菠蘿，香甜嘅菠蘿面頭有焦脆嘅黑糖脆皮，菠蘿爆汁，甜到入心。百香果梳打 $28 & 菠蘿可爾必思 $32夏天當然唔少得叫返杯特飲解暑，兩款入面都有果肉，果味香濃好飲，消暑解渴。 。。大眾燒肉酒場 (旺角)旺角通菜街1A-1L號威達商業大廈Deli2 一樓1A號舖。。
