專程黎咗呢間蠔埕食日本蠔同佢地主打嘅備長炭串燒。一早喺OpenRice訂位仲有預付套餐優惠，非常抵食。揀咗呢款「廚師發辦-炭火海鮮串燒宴」(OpenRice 75折後$585/位)，可以食到3款季節前菜、時令日本生蠔、炭燒時令貝殼類海鮮、炭燒時令甲殼類海鮮、6款炭火串燒、炭燒醬油飯團、日式味噌湯同甜品。先講前菜，今日就食到八爪魚海藻沙律、蟹膏豆腐同螢光魷魚。八爪魚同螢光魷魚都好爽彈，鮮味十足。個蟹膏豆腐口感幼滑，入口係滿滿香濃嘅蟹膏味。套餐包咗1隻日本時令生蠔，今日就有黎自兵庫縣嘅生蠔，生蠔肉質飽滿鮮嫩，滑溜creamy，味道甘甜爽口，有淡淡海水味一d都唔腥。師傅喺生蠔面頭淋咗少少酸汁，帶出蠔嘅鮮味。生蠔得一隻又點會夠喉，知道餐廳做緊加購優惠，日本時令生蠔$20/隻，咁抵食就叫多咗半打過吓癮。跟住就係重點嘅炭火海鮮同串燒。呢度嘅炭火燒烤用嘅係日本紀州備長炭，不惜工本非常有誠意，燒出黎嘅海鮮同串燒食落有淡淡的炭香味，風味十足。兩款時令海鮮分別係燒扇貝同燒鮑魚，師傅火候控制得岩岩好，扇貝食落仲係水嫩多汁，至於鮑魚就口感爽彈，兩款都鮮味十足。 串燒方面有日本南瓜、白鱔、明太子雞肉、黑松露月見雞肉棒、阿波美雞翼同雞軟骨。最好食係燒白鱔同阿波美雞翼，調味做到提鮮嘅作用又唔會搶咗食材本身嘅味道。白鱔外皮燒到香脆可口，鱔肉彈牙爽口。阿波美雞全翼一啖咬落去d油脂同肉汁就爆哂出黎，肉質嫩滑。食完串燒仲有醬油燒飯團、味噌湯同甜品。飯團燒到微微焦脆，用海苔包住，食落有香濃醬油味但唔會好鹹。味噌湯暖笠笠都幾好飲。甜品就有黎自日本嘅赤肉蜜瓜，甜度爆燈。呢到仲有多款日本果汁汽水供應，隻隻味都好想試，最後叫咗兩枝飲，分別係富士山柚子同完熟白蜜桃，兩款都果味香濃，係好清新嘅果味，加埋梳打汽水，飲落好清爽。 。。蠔埕 (尖沙咀)尖沙咀彌敦道176號The Nate2樓A號舖。。
