行開旺角見到呢間新開嘅omakase，價錢親民，最平價位$480就食到。思前想後揀咗中間價位嘅「御巧 」，$680有齊前菜、刺身6款、手握壽司7件、手卷1件、味噌湯同甜品，魚生新鮮質素唔錯，份量亦都足夠。 前菜前菜已經有3款，分別係當造嘅螢光魷魚、胡麻醬豆腐同柚子蕃茄。螢光魷魚好鮮味，面頭嘅醬汁味道好獨特，有濃郁鹹香。豆腐本身加入咗胡麻醬去整，唔係滑身反而係好有豆腐質感，加埋面頭有蟹肉同三文魚子，口感豐富。至於柚子蕃茄就好滑新，淡淡柚子香正好可以清一清味蕾食刺身。 刺身-右口魚：又叫鮫鰈魚，係高級刺身食材，肉質緊實爽彈。師傅細心交待可以先食呢款。-鰆魚：時令魚之一，輕輕火炙過，口感軟嫩，魚味濃郁。-真鯛：同樣火炙過逼出油香，魚身厚肉，食落好有質感。-油甘魚：厚切刺身夠哂肥美，入口充滿油香。-活帶子：面頭撒咗少少竹炭鹽帶出鮮味，肉質水嫩豐盈。-活赤貝：食得出非常新鮮，味道鮮甜口感爽彈。 壽司 值得一提呢到嘅壽司飯，本身帶少少鹹甜味，唔洗點豉油食都得，飯身仲係暖暖哋，非常貼心。-深海池魚：有濃郁魚味，口感偏爽，帶少少筋。-火炙金目鯛：火炙過嘅金目鯛賣相好靚，更加能夠帶出魚香。-北寄貝：厚肉爽口，不過就冇活赤貝咁鮮甜。-池魚：肉質比起深海池魚偏軟熟d，師傳喺面頭放咗薑蔥蓉，入口多一份辛香。-火炙鮫鰈魚：全餐覺得最好食嘅一款魚生，火炙嘅時候已經見到d油脂不斷滲透出黎，火炙過之後好香，入口即融，油脂喺口腔入面四散。-大拖羅：夠哂肥美，d油花分佈好平均，同樣係入口即融。-海膽：滿滿嘅海膽放喺壽司上面好似就黎滿瀉咁，誠意十足，海膽新鮮，口感幼滑細緻。蔥吞拿魚蓉手卷食完壽司仲有手卷，吞拿魚蓉嘅比例仲多過飯，咬落去每一啖都食到啖啖軟綿吞拿魚蓉。 石狩汁用咗大量三文魚、麵豉同好似京蔥、蘿蔔、卷心菜等唔同嘅蔬菜去煮成湯，奶白色湯頭飲落係非常鮮甜，仲帶有蔬菜嘅清甜味，飲落暖笠笠。三文魚腩嘅部位啖啖肉仲有滿滿嘅omega 3。抹茶豆腐 甜品方面有抹茶豆腐，睇個樣以為係布甸或者奶凍，原來係充滿和風嘅豆腐甜品，質感好滑溜之餘食得到好香嘅抹茶味同豆腐味，非常有特色。加埋面頭嘅紅豆蓉食又有另一番風味。 。。巧 すしたくみ (旺角)旺角山東街53號地舖。。
