香港多咗好多食黑毛和牛嘅餐廳，除咗常見嘅燒肉、打邊爐，當然唔少得黑毛和牛漢堡扒。會展站開咗之後黎灣仔北就非常方便，今次就黎咗呢間食日式漢堡扒嘅餐廳。 Winter Celebration Dinner Set $1499 for 2 當係提早慶祝聖誕節，我哋叫咗餐廳個冬日節慶2人套餐，有齊沙律、湯品、意粉、主菜、甜品同飲品，夠哂豐富。 蟹籽蟹肉沙律 先講個沙律，清爽沙律菜面頭鋪滿鮮甜蟹肉同蟹籽，加埋個 酸酸哋嘅油醋汁，夠哂開胃。 香煎帶子南瓜湯 店員會先將煎好嘅帶子上枱，再倒入熱辣辣嘅南瓜湯，非常有心思。帶子煎到金黃色，夠大隻厚身，入口就做到超嫩口同啖啖肉嘅感覺。南瓜湯亦都好順滑creamy。 三文魚味噌魚籽意粉 跟住落黎嘅意粉，口感彈牙，忌廉汁香濃，重點係d三文魚籽，每一粒喺口腔到都會爆發出極緻鮮味同鹹香。 日本產黑毛和牛牛柳扒 到萬眾期待嘅主菜，我哋揀咗兩款黑毛和牛，其中一款嘅牛柳扒，我哋叫咗5成熟，唔單止牛柳厚身，牛柳烤到外面焦香，入面仲係超級粉嫩，見到都流哂口水。食落肉質超腍嫩，充滿肉汁，仲可以點個紅酒汁、wasabi、芥末或者海鹽黎食。 100%日本產黑毛和牛漢堡扒配黃金雲丹及溫泉蛋 至於另一款主菜當然係點餐廳嘅招牌菜黑毛和牛漢堡扒，漢堡扒入面收埋咗隻溫泉蛋，面頭用海膽鋪蓋住，再淋上醬汁，一切開塊漢堡扒d蛋汁就會流哂出黎，勁吸睛。漢堡扒肉味香濃，肉香同油香充斥口腔，再加上香濃蛋汁同鮮甜海膽，味道口感都非常豐富有層次。 麵包布甸伴雲呢拿雪糕 最後食甜品有麵包布甸，係偏向實淨嘅口感，加埋香甜雲呢拿雪糕，非常有聖誕節氣氛。 。 。 Grill Tajimaya (灣仔) 灣仔港灣道30號新鴻基中心2樓2A-1號舖 。 。
