喺尖沙咀韓國街呢到零零舍舍有一間日本餐廳，之前喺到買過外賣覺得魚生嘅質素唔錯，價錢合理。疫情期間仲未有得去日本，唯有黎食餐豐富嘅omakase，以解思鄉之苦。我哋晚市時段幫襯，叫咗一份omakase、壽司盛盒同一品料理兩個人share。呢到嘅omakase $1180/位，總共會食到19款嘢食咁多，非常之豐富。前菜2點 -水母刺身：外表晶瑩剔透，食落口感非常之爽脆。-磯煮鮑魚配鵝肝醬：鮑魚煙靭彈牙，甜甜哋嘅磯煮醬汁入哂味，配埋香濃鵝肝醬一齊食，出奇地夾。刺身6點-鯡女魚薄切：師傅刀功了得，薄薄一片嘅魚生好甜，面頭嘅蔥帶起咗魚嘅鮮味。-活帶子拼活赤貝：一次過食到兩款活貝類刺身，帶子口感水潤豐盈，赤貝則係清甜爽脆，食得出非常新鮮。-北海道原隻紫海膽：一上枱已經”嘩”一聲，用咗原隻紫海膽開殻上，入面仲放滿吞拿魚蓉同三文魚子，奢華指數爆燈。海膽入口即融，簡直就好似雪糕咁，味道鮮甜，齒頰留香，單係食完果種回甘已經值回票價。-沙甸魚卷：用紫菜包住沙甸魚刺身再包住其他配菜整成卷物，食落冇想像中咁腥。-煙燻鯖魚：用煙燻嘅手法去整鯖魚都係第一次食，完全癲覆咗我對鯖魚嘅印象，煙燻味好香，魚身外熟中間帶少少生，令刺身有雙重口感。-火炙大拖羅：大大片大拖羅用火炙手法處理逼出油香，師傅加咗岩鹽去燒，再用紫菜同紫蘇葉包住，大拖羅超級肥美，一入口油脂就喺口到爆發出黎。食完6點刺身之後，喺食和食同壽司之前會有個間場。餐廳亦都好細心準備咗好似牛蒡、蕎頭等嘅涼菜俾我哋開一開胃先。 和食-蝦膏炒虎蝦：Omakase入面嘅呢味虎蝦，用咗香濃蝦膏去炒虎蝦肉，鹹香惹味，蝦肉好彈牙。-脆炸原條鰈魚 $168我哋另外點咗份炸鰈魚，鰈魚連骨炸成條上枱，魚件炸到金黃酥香，脆而不膩。手握壽司6貫-大拖羅：粉嫩嘅顏色非常吸睛，脂肪濃厚，油脂香濃，入口即融。-墨魚：出乎意外唔係平時爽脆嘅口感，反而係非常之綿滑。-黑鯥拼魚肝：黑鯥貴為深海魚，產量稀少，肉質彈牙，味道非常鮮甜，配埋燒過嘅魚肝一齊食，真係好香。-金目鯛：鮮豔嘅顏色賣相好靚，肉質柔軟細膩，魚香味好重。-北寄貝：面頭輕輕炙燒過，口感爽口。-海膽：雖然冇頭先原隻海膽咁驚豔，但依舊係好綿滑鮮甜。海·七貫壽司盛盒 $250另外叫嘅呢個壽司拼盤，有7款唔同種類嘅壽司，全部都好新鮮。-帆立貝：肉質厚嫩，好鮮甜。-中拖羅：冇大拖羅咁多油花，油脂分佈相對地平均。-深海池魚：口感爽彈，食落非常有咬口。-海蝦：蝦肉夠哂大隻，質地係比較實淨同彈牙。-三文魚：面頭加咗d柚子胡椒，消除咗部分肥膩感，味道變得清爽。-油甘魚：肥美嘅魚身有濃厚嘅魚油甘香。-平靜魚：比較少見嘅一款刺身，口感偏爽，帶少少爽筋。手卷食完壽司，omakase 仲有一款手卷。呢件蔥拖羅手卷，入面包住滿滿嘅蔥拖羅蓉，另外仲加咗櫻花蝦，增加口感層次。吸物食咗咁多生冷嘢之後最岩就係飲返碗暖胃嘅魚湯。魚湯好鮮甜，而且一d都唔腥。甜品 最後當然唔少得以兩款甜點為呢一餐畫上圓滿嘅句號。-靜岡蜜瓜：糖度極高，入口非常之清甜多汁。-抹茶奶凍：呢款抹茶奶凍做得十分之出色，可以話係我暫時食過最好食嘅奶凍。佢絕對做到超奶滑嘅口感之餘又唔會好似奶咁流質，配埋面頭個濃郁抹茶醬，幼滑香濃。p.s. 如果想單叫呢款奶凍記得要預約。總括以omakase黎講，算係嘢食高質、性價比唔錯嘅一間。。。晴空日本料理 (尖沙咀)尖沙咀金巴利街8號地下1號舖。。
