日本拉麵就食得多，日式撈麵都係第一次食，去咗呢間全港首創位於灣仔嘅Kokoro。正宗全料東京撈麵(L size $109)呢款招牌撈麵配料勁豐富，有叉燒、生蛋黃、肉燥、紫菜、蔥花、蒜蓉、鰹魚粉、糖心蛋等等，醬汁非常香濃，辣辣哋好惹味。麵底係粗麵黎，煙靭有咬口得黎仲好掛汁添。叉燒粒燒得好香，肉質稔嫩，一口size大小岩岩好。 24月熟成芝士撈麵(L size $109)至於另一款芝士撈麵，用咗24個月嘅熟成芝士，淋喺叉燒粒同埋麵底上面，芝士味香濃。將d半熔嘅芝士、生蛋黃同麵撈埋夾起見到拉芝嘅效果已經好想食。芝士控一定唔可以錯過。仲可以撈埋玫瑰醬(代替香醋)一齊食，多一份香甜清新感。麵嘅食法係先將醬汁、生蛋黃、配料同麵撈勻，食到咁上下仲可以加黑胡椒同秘製香醋撈埋一齊食，令到個麵冇咁膩。如果食完碗麵未夠飽，仲可以加白飯落剩餘嘅醬汁到撈勻變肉燥飯添。我同朋友食完麵就已經飽飽所以就冇試到，大食嘅朋友可以挑戰一下。跟餐仲可以加$9要埋汽水、烏龍茶等飲料。 餐廳設計都特別呀，原來其中三幅牆都係由日本人氣書道家万美親自到港畫😍好靚呀 。。麺屋こころ (灣仔)灣仔灣仔軒尼詩道68號地下1C舖。。
