作為荃灣地頭蟲，因為Donki關係，成日都會行海之戀～今日竟比我發現到有間好嘢！那就是Peko Peko Eatery！呢間Cafe嘅元祖店係何文田開，開咗短短一年就設分店，進駐埋海之戀！因為無去過何文田店，所以喺度用餐，成個體驗都好新鮮！ 首先，餐廳環境好闊落，裝修就走簡約小清新風！好有深水埗啲文青Cafe feel，不過呢度大好多咁解！餐廳仲分戶外及室內兩part，戶外對正荃灣海濱！對住海景食飯，陽光明媚，海面閃閃生光，成件事好梳乎！但咁樣食飯，人均都係一百左右，真係CP值爆燈！ 至於食物方面，店家主打和洋料理！食物會好似和式料理咁，細細碟，一份份咁上，仲可以自選鍾意嘅餐點組合，成件事幾貼心！ 整體食物嘅味道都偏輕，調味料唔多，夠唔夠味見仁見智，如果for我就剛剛好。另外，餐點嘅蔬果比例幾高，想食得健康嘅人，揀呢度會係個好選擇。 ✦ Lunch Set HK$782款Starter＋1款Main+飲品，套餐連味噌湯、飯/烏冬，以及飲品。Starter及Main都各有6款可揀，以下係我哋試過嘅自選菜式： Main - 柚子秋葵蝦 - 將彈牙嘅蝦滑釀入秋葵，加咗少少柚子汁，成個組合清新滑嫩，比預期好味。 Main - 日本帆立貝泡菜 - 帆立貝啖啖肉，爽口，口感不錯，可惜泡菜隻味有啲濃，有啲搶味，嘗不出帆立貝嘅鮮美。 Starter - 三文魚車厘茄藜麥沙律 - 沙律菜幾新鮮，落嘅甜醋好開胃。三文魚係熟的，但唔乾柴，做得唔錯。 Starter - 流心芝士波 - 呢隻小食必須趁熱價！入面嘅芝士波好creamy、濃郁，入口嗰下好治癒！個皮如果再做得薄身啲，我相信會更高分。 Starter - 和風蛋卷 - 呢款玉子做得唔錯，厚身而唔乾。加咗沙律醬、蟹籽、昆布碎入玉子，味道好有層次感。 ✦ 和風竹炭烏冬 Lunch Set HK$78第一次食到竹炭烏冬，食上去，有啲似墨魚汁意粉感覺，幾清香。套餐仲會跟三文魚籽玉子，以及鰻魚玉子，味道正常發揮。 ✦ 抹茶拿鐵 HK$38呢度拉花抵讚，拉得好精細對稱！味道就濃淡適中，容易接受。呢款抹茶粉偏濃，飲到底有少量沉澱物，隻粉分布得有啲不均。★－:+:－:+:－:+:－:+:－★ 🎡味道：3.5🎠環境：4🎪服務：4.5🕌CP值：4（*5為最高分）★－:+:－:+:－:+:－:+:－★◌ Peko Peko Eatery◌ 荃灣大河道100號海之戀商場1樓1006-1007號舖★－:+:－:+:－:+:－:+:－★🎀 記得like埋我，每日放送打卡好去處！📸https://www.facebook.com/daydaycheckinhttps://www.instagram.com/daydaycheckin💗ᴿᵉᵃᵈ ᴹᵒʳᵉhttps://flowspace.hk/
