我成日食日本嘢,無論刺身、壽司、拉麵、定食、sake.... 基本上都好鍾意,零抗拒力!不過,講到高級嘅Omakase,喺香港倒係未試過。一嚟一餐1k落樓走唔甩,二嚟成日都覺得,香港就算比得起錢,都食唔到日本嘅質素。 尋日放假,一條友行銅鑼灣,見到鮨三川做緊四百零蚊嘅12貫Omakase壽司lunch set!感覺幾抵食,於是就入去試下!鮨三川係今年4月開嘅店,之前都Keep住有fd話抵食兼有質素,今次食過,果然名不虛傳。 手法正宗 細節周到 雖為lunch set,但食得出師傅係每個細節都落足心機。好似上菜次序,師傅先會比酸甜嘅柚子沙律及黑松露茶碗蒸刺激食慾。接下來,12貫壽司會按味道由淺到濃咁一件件推出,最初幾貫強調魚肉嘅鮮甜質感,中段加帆立貝、牡丹蝦做間場,去到尾段幾貫,味道會愈來愈濃郁、油脂相對豐富,成件事好漸進式推進,令人不會產生味覺疲勞。 去到最後,食多咗魚生,仲有碗熱辣辣嘅烏冬打底,暖一暖胃,感覺不錯。 Omakase另一個講究位係師傅嘅調味及醃製食物技巧。一般Omakase壽司都主張盡量唔想客人額外加豉油提味,即意味住壽司要有足夠嘅調味,既要保持魚鮮嘅新鮮,味道又唔能夠太造作,好考師傅對食材嘅處理技巧,呢個亦係Omakase點解咁矜貴嘅原因,經驗老師傅唔易做! 不過,鮨三川呢方面處理尚算唔錯。師傅有同我分享,每款魚生都經過佢多次嘅調味及醃製實驗,先做到而家「無添加」嘅食用效果。好似我試嘅其中一款醬油積赤身壽司,先要用醬汁醃足赤身一晚,中間又加柚子胡椒,提升肉質鮮味等,功序多多。 ▲用餐前,店員會遞上三角濕紙巾。 ▲三角濕紙巾旨在清潔指頭。 ▲正宗Omakase係用手直接食壽司。至於飲食禮儀,我亦鍾意佢哋跟足日本,如Omakase一般會徒手食壽司。上壽司前,店員會預備好三角濕紙巾比我清潔指頭,方便我攞壽司食,係度食飯,真係咩日本旅行回憶都返晒嚟! ✦ 12貫壽司lunch set HK$398 (*另收加一) 按出菜次序: ▲前菜感覺都唔錯! ▲黑松露茶碗蒸,無諗過蛋及黑松露咁夾! ▲茶碗蒸好燉滑,入面有白果、蘑菇、蝦等配料,幾足料。前菜:柚子沙律、黑松露茶碗蒸沙律偏酸,食完好開胃。至於茶碗蒸則做得好嫩口,左右搖時會動L,不過個人略嫌淡咗少少,而面層嘅黑松露好香濃,昇華成個茶碗蒸嘅味道。 1/ 鱸魚 - 相對嚟講,味道較啖口,不過肉質幾彈牙鮮甜。加咗蔥花,幾香口。2/ 鰤魚 - 加咗柚子胡椒,好清香!鰤魚好肥美,口感一流。 3/ 帆立貝 - 師傳改咗帆立貝嘅既有切法,中心切開包裹著飯,咬上去會令帆立貝更爽口,好神奇!另外,帆立貝上灑咗竹碳鹽,調味兼引出鮮味。4/ 深海池魚 - 中間有啲柚子皮,好清新,食嘅感覺好舒服,不錯。5/ 金目鯛魚 - 師傳指有用熱水淥過魚肉,會魚肉更煙韌爽口。6/ 燒蝦膏牡丹蝦 - 牡丹蝦好肥美,肉質細滑!牡丹蝦蝦膏經過火炙,好香濃,加埋蝦肉及飯食,正! 7/黑目魚 - 深海魚肉質份外彈牙,表層燒過,脆脆地好正。肉上仲放咗幾條嫩口嘅芽蔥,連埋一齊食,味道好有層次感。8/ 香蔥吞拿魚 - 碎吞拿魚取自骨與骨之間嘅肉,口感爽點啲,上面仲放咗芝麻、蔥、千本漬(醃蘿蔔),用料豐富。9/ 醬油漬赤身 - 經過一晚自家製醬油浸泡,赤身咸中帶微甜,灑咗少少柚子胡椒,口感清香。10/ 大拖羅 - 師傅揀咗吞拿魚嘅蛇腹位置,會放置一會,等油份滲出嚟先比客人食。味道果然好肥美,入口即溶!好正!11/ 三文魚籽軍艦 - 三文魚籽好大粒,好新鮮,食上去卜卜脆,紫菜都脆口,食得出師傅對食材處理得好用心!三文魚籽上仲有柚子碎,有助解膩。12/ 北海道馬冀海膽 - 接下來係海膽壽司!上一個軍艦加柚子就係為咗清一清味蕾。呢度嘅海膽咬到一塊塊厚肉嘅質感,鮮甜美味!我仲見到師傅鏟咗一大舊比我!太澎湃了!感動! 飯後熱食:食完十二貫壽司,師傅仲會送上熱湯烏冬。湯汁以魚汁及冬菇熬成,好鮮甜! 飯後甜品:最後仲可以揀雪糕/咖啡,今次我揀紅豆雪糕,入面仲有紅豆粒,基本上都幾飽肚! ▲好鍾意鮨三川嘅Yu師傅,總係不厭其煩同我慢慢講解每件壽司嘅做法!臨走前,我仲厚面皮討合照! ▲有機會大家都要嚟試試!★-:+:-:+:-:+:-:+:-★🎡味道:4🎠環境:4🎪服務:4🕌CP值:4(*5為最高分)★-:+:-:+:-:+:-:+:-★◌ 鮨三川◌ 銅鑼灣渣甸街50號渣甸中心6樓★-:+:-:+:-:+:-:+:-★🎀 記得like埋我,每日放送打卡好去處!📸https://www.facebook.com/daydaycheckinhttps://www.instagram.com/daydaycheckin💗ᴿᵉᵃᵈ ᴹᵒʳᵉhttps://flowspace.hk/