荃灣好多嘢都好，就係衰在無咩台式食店！😏直到我遇上「你妳」，簡直係我呢個台菜控嘅救星！呢間新開嘅粉紫色小店，位於南豐中心對面，位置好方便！人均約100，食物大大份，感覺都唔錯。除咗有魯肉飯、牛肉麵、乾拌麵、鹽酥雞、炸花枝丸，仲有鐵板手作芋泥吐司及仙草糖水等！！簡直係一個台灣人氣美食嘅集合體，正正子！😝 ▲「你妳」好似將台灣嘅所有小食集合埋一齊咁，好豐富！ ✦ 鹽酥雞花枝丸魯肉飯 HK$78第一下見到呢個飯，真係比佢個份量嚇一嚇，佢哋收78，真係比返78嘅料人！炸花枝丸都有4粒，鹽酥雞都有一個拳頭咁多，仲有溫泉蛋及魯肉飯等等，真係好大份！至於味道，我會覺得偏濃，花枝丸微甜爽口，鹽酥雞唔乾柴，唯獨係魯肉飯，雖然夠香，但乾咗少少。 ✦ 士林香腸烤雞腿乾拌麵 HK$78又係大份到爆，雞槌都有3個！仲有好多惹味嘅士林腸，感覺幾好食，但同魯肉飯一樣，個乾拌麵太乾，夾上嚟係一餅餅。 ✦ 肉鬆芋泥吐司 HK$40佢個芋泥餡好香滑濃郁，抵讚！配埋個肉鬆，口感又滑又沙沙地，好味！ ✦ 燙青菜 HK$28同台灣一樣，會加魯肉汁係上面，正常發揮，算係幾好味。 ✦ 炭培烏龍珍珠奶茶 HK$8（跟餐）奶同茶嘅比例幾好，夠香滑，略嫌珍珠唔夠 煙韌。 ✦ 蜂蜜綠茶 HK$3（跟餐）唔會好甜，幾清新，正正常常。 ✦ 仙草3號 HK$46無諗到呢度嘅布丁係細細粒，用啫喱小布丁，感覺幾搞笑。我覺得佢哋做個仙草幾清甜，無苦味，幾好。芋圓則唔夠煙韌，好似烚太耐無過冷河咁，有少少扣分。 ▲「你妳」座位比較窄，唔算好好坐。 ▲荃灣難得嘅台式小店，仲要夠晒正宗。★－:+:－:+:－:+:－:+:－★🎡味道：4🎠環境：3🎪服務：4🕌CP值：4（*5為最高分）★－:+:－:+:－:+:－:+:－★◌ 你妳◌ 荃灣運通街6號運通洋樓地下K號舖★－:+:－:+:－:+:－:+:－★🎀 記得like埋我，每日放送打卡好去處！📸https://www.facebook.com/daydaycheckinhttps://www.instagram.com/daydaycheckin💗ᴿᵉᵃᵈ ᴹᵒʳᵉhttps://flowspace.hk/
