鐵火堂我成日幫襯~🤤相信大家都對佢哋啲爆餡大拖羅丼唔陌生,一碗百零二百蚊有交易,仲有一定自由揀自己想食嘅配料,真係抵食又好味! ▲尖沙咀首都廣場嘅新分店,可以睇到劏魚Show。 ▲新店主要以立食及外賣為主。旺角店同尖咀店我都去開,唯獨未去過尖咀首都廣場嘅新分店!前幾日終於去咗.....原來呢度隔日下午4點半,都會舉行劏魚秀!我去時剛好遇上!可以睇到師傅,即席分割足足重達78公斤嘅藍鰭吞拿魚,唔講以為自己去咗日本漁市場! ▲每逢一、三、五下午,店家都有劏魚秀。 ▲師傅劏魚手法純熟,好快就將魚分割好。 ▲原條藍鰭吞拿魚稀珍嘅部位「頸拖羅」。劏魚期間,師傅又用鋸,又用刀,過程相當吃力呢!😯 切好嘅魚肉部位,兩三個師傅用人鏈方式傳去廚房,好似搬磚咁!😂身為女生嘅我應該做唔嚟,睇見都覺得累呀! ▲睇Show期間,店員會向現場觀眾免費派發新鮮嘅赤身! ▲新鮮嘅赤身,肉質柔軟,令人難忘。另外,店員仲會即時向觀眾免費派發新鮮嘅赤身!據店員所講,店家用嘅藍鰭吞拿魚均來自鹿兒島櫻島,朝早上機,下午到店,新鮮度爆標!無經過長時間嘅冷藏,連赤身都份外軟柔鮮甜呢!(出面壽司店成日都食到橡膠質地嘅赤身....😔)又睇又食,成件事幾爽YY! ▲一條魚只有少量腦天或頸拖羅,可以喺鐵火堂買到。睇完Show,大家仲可以買走刺身,其中,藍鰭吞拿魚較珍貴嘅部分,好似天腦、頸拖羅等,幾乎每次師傅切好,就會比人秒掃!無計啦,呢啲部分除咗Omakase,一般料理店都好難買到/食到!仲要價錢相對抵咁多,識食之人點會放過! 可惜首都廣場店只係設立食/外賣服務,無得坐低慢慢歎,不過就比其他分店多咗頸拖羅可試!今次我就點咗四式吞拿魚刺身&壽司,再加大拖羅三文魚籽飯,肥就肥硬架啦,鬼叫自己為食咩!😭 ✦ 自選魚生丼(大拖羅+碎蔥吞拿魚+三文魚籽)HK$165我怕食唔落,所以簡單揀咗3款配料~我勁鍾意佢哋嘅大拖羅,肥美甘香,入口即化,簡單加點豉油,成件事好幸福!😍 同埋佢哋嘅吞拿魚係即劏即送上,所以完全無雪味,完美還原日本嘅美味! ✦ 自選魚生丼(大拖羅+中拖羅+赤身+三文魚籽)HK$205朋友係吞拿魚怪,佢就3種拖羅都圈晒,佢總結同我一樣,最愛大拖羅。不過佢對赤身都好高評價,因為出面食到嘅赤身,好多時都好淡,食上口好似食膠咁!呢度嘅赤身夠新鮮,所以質感好軟滑,味道一定不及中拖羅,大拖羅架啦,但有驚喜! ✦ 拖羅壽司盛合 HK$50呢個盛合幾抵食,有1件大拖羅壽司、1件中拖羅壽司、2件赤身壽司。嫌丼飯未夠喉,基本上加埋呢4年壽司,就會飽到DiDi。 ✦ 100g刺身盛合:頸拖羅 HK$160、大拖羅 HK$130、中拖羅 HK$100、赤身 HK$60呢個我同Timbee一人一半,圖4為半份份量~點呢款係因為太想食頸拖羅!比大拖羅更肥美呢!一咬入口,堅係入口即熔,好奇妙嘅質感!濃郁又滑嫩!好正!😍🤤❤️不過呢款刺身食不過三,因為第一下好正,第二口已經膩膩地,第三口會feel到成咀油,有啲頂唔順~真係幾肥下,點完豉油,碟子已浮咗一層油,還是少食多滋味好了!點呢款建議多搵幾個朋友share。P. S.我幾鍾意鐵火堂嘅飯丼,豐儉由人,好似車仔麵咁,圈自己鍾意嘅餸,然後加相應嘅價錢~!我反而唔鍾意出面啲丼,set好晒啲配料組合,自己揀就可避免浪費!另外,店家主打外賣及立食,此Post啲食物有碗盤盛載,因為我想影相,有額外向店家要求!實際現場嚟食,客人嘅食物係用外賣包裝~【詳情】藍鰭吞拿魚 劏魚表演時間:逢一、三、五 下午4點半★-:+:-:+:-:+:-:+:-★🎡味道:4.5🎠環境:3🎪服務:4🕌CP值:4(*5為最高分)★-:+:-:+:-:+:-:+:-★◌ 鉄火堂◌ 尖沙咀漆咸道南61-65號首都廣場地下5號舖★-:+:-:+:-:+:-:+:-★🎀 記得like埋我,每日放送打卡好去處!📸www.facebook.com/daydaycheckin💗ᴿᵉᵃᵈ ᴹᵒʳᵉwww.instagram.com/daydaycheckin