作為元朗國國民，好日都唔會去將軍澳，無計啦，坐巴士/地鐵都至少轉3次車，對我嚟講簡直係地球另一端！😂而我唯一去將軍澳嘅機會，大概就係接男友收工（久唔久都會廿四孝一下）～既然難得嚟到將軍澳，當然順道搵下附近有咩食～而「源袓之味古早蛋糕店」就係我造訪嘅其中一站！ ▲源袓之味係商場內，遇正出爐時間，排隊都唔會太辛苦。 ▲店舖另一側係雞蛋主題房，係度Hea住等蛋糕出爐，又或者打卡都好正！ ▲好可愛嘅布置，相信小朋友實會好鍾意！ ▲店員切割新出爐嘅蛋糕，仲冒緊煙，睇見都流口水！ ▲切好即印Chop印，另一個店員就包裝，超快手!呢間古早蛋糕店7月先開，都好新下。之所以對佢印象特別深刻，大概就係佢有隻全港獨家嘅心型玫瑰蛋糕！可惜去時，撞唔啱出爐時間，所以今轉無試！😭反而臨近中秋，佢哋出咗2款中秋限定口味，分別係奶黃口味及鹹蛋黃味，所以就揀咗呢2隻味～另外，佢哋隻雲石朱古力亦好評如潮，所以呢次都揀埋呢隻～（下轉先試玫瑰啦😭） ✦雲石朱古力 HK$75雖則呢款雲石蛋糕係用比利時黑朱古力整，但味道無想像中咁甜！甜度對我嚟講，啱啱好！👍🏻我勁鍾意佢隻朱古力味，濃郁得嚟帶少少堅果香，趁熱出爐食真係好正！😍 ✦香滑奶黃蛋糕 HK$85（中秋限定）每一口都有濃濃嘅奶黃及雞蛋香，味道好正！另外，不得不讚係混和咗兩款材料，仍無減蛋糕嘅鬆軟感，入口第一下係綿密又Q彈嘅質感，不消一會，蛋糕就慢慢係口腔中化開，非常高質！ ✦鹹蛋黃蛋糕 HK$85（中秋限定）鹹蛋黃同鬆軟嘅古早味蛋糕簡直係絕配，鴨蛋嘅鹹香，令蛋糕嘅香甜味更突出，切開時，見到好多一粒粒嘅鹹蛋黃佈滿喺蛋糕中間，一啖啖食，feel沙沙嘅蛋黃質感，真係好正，推薦！總結嚟講，試過源祖之味，比我較印象深刻就係質感，真係做得比一般市面嘅古早味蛋糕店鬆軟，可見店家打發雞蛋時，做得相當到位！另外，蛋糕亦好足料，鬆軟但唔係空氣質感嗰隻，好實在，食兩片開始有啲飽肚！唔怪得一到出爐時間，門口長期排滿人。中秋團圓，買返幾個回家食都唔錯！★－:+:－:+:－:+:－:+:－★◌ 源祖之味古早蛋糕店◌ 將軍澳貿業路8號新都城中心一期2樓254-255號舖★－:+:－:+:－:+:－:+:－★🎀 記得like埋我，每日放送打卡好去處！📸www.facebook.com/daydaycheckin💗ᴿᵉᵃᵈ ᴹᵒʳᵉwww.instagram.com/daydaycheckin
