▲K11 Art Mall新嘅Pop UP Store「'ello」，可以試勻一系列特色冬甩。雖然我一日到黑話要減肥，但其實成日偷食...><冬甩就係其中一樣，令我好難抗拒嘅美食！（究竟係邊個發明冬甩，真係邪惡到爆囉，唔該！）呢排K11 Art Mall仲開咗間Pop Up Store「'ello」，專賣一系列手工鹹甜冬甩，部分口味仲加入港式元素，勁特別，行開行埋，無理由唔試！ ▲舖面設計好型，打卡好正！ ▲冬甩共有3種類型，包括甜冬甩、雪糕冬甩及鹹冬甩。————————————✦ ✧ ✦ 甜冬甩 ✦ ✧ ✦————————————冬甩都是甜，呢個並唔係咩新鮮事，但我覺得'ello即便甜冬甩，感覺都特別過人！又加入烤綿花，又有吉士醬，餡料好豐富！ ✦Lemon pie $48Lemon Pie上面就有一圈烤綿花糖，真係邪惡到無眼睇！不過咬開時半熔狀態，真係極治癒~冬甩內係檸檬吉士醬，味道好fresh！雖然略甜，但唔算膩，感覺都還可以！ ▲意式冰糕質感似冰皮月餅，喺室溫都不會融化。 ▲意式冰糕中心由花生醬及草莓覆盆子果醬製成，外層係自製草莓果醬，酸甜不膩。✦PBJ semifreddo HK$68竹炭冬甩中間，夾住咗件花生醬＋草莓果醬製成嘅意式冰糕！雖然叫冰糕，其實喺室溫下都無咩點溶，口感似雪糕脆批＋冰皮月餅嘅感覺呢！個人覺得都幾特別，值得一試。————————————✦ ✧ ✦ 雪糕冬甩 ✦ ✧ ✦————————————'ello有3款雪糕冬甩，基本上3款我都試晒！🙊店家會即時喺我哋面前，將配料加入雪糕兜勻，邊食冬甩仲可以邊注入漿汁，幾好玩！ ✦HK milk tea HK$58港式奶醬多嘅概念？係奶茶雪糕上加咗多士粒，而漿汁係練奶！感覺好有茶餐廳風味，幾得意。😂 ✦Ginger stem HK$58真心未試過薑味雪糕＋紅棗乾嘅冬甩，好養食！薑味嘅辛辣口感，令雪糕食上口有種回甘味，加埋甘甜嘅紅棗乾及薑味紅糖糖漿，係試咗多款甜冬甩中，我至愛嘅口味。 ✦Banna caramel HK$58呢款雪糕冬甩係3款中最甜，夾心係香蕉雪糕＋焦糖脆脆，漿汁係焦糖～打卡幾好，不用對我嚟講甜咗啲。————————————✦ ✧ ✦ 鹹冬甩 ✦ ✧ ✦————————————甜冬甩食得多，鹹冬甩真係第一次試！'ello將冬甩皮整成熱狗形，上面灑滿麵包糠，食上去脆脆地，好特別。另外，佢哋仲加咗好多fusion餡料，整體系列都令人幾驚喜。 ▲外層灑滿麵包糠，酥脆冬甩皮真係好特別。 ▲四川麻辣牛肉好惹味，中間溫泉蛋亦好高質，非常推薦！✦Mala Beef & Egg HK$72真係無諗過四川麻辣牛肉可以關冬甩事～中間仲有隻溫泉蛋！好似食緊牛肉丼咁！只是飯底變冬甩皮咁解！個人覺得超好食，牛肉片嘅麻辣味，意外地襯個酥脆嘅冬甩皮，一甜一辣口感唔錯！另外，唔好睇個熱狗細細隻，牛肉量好多，食完都幾飽肚。 ✦Pork Belly & Kimchi HK$72呢個同牛冬甩大同小異，不過就換成韓式風味。餡料係辣椒醬豬腩片及泡菜，豬腩片唔多肥肉，肉質爽口，又有泡菜，幾惹味。 ✦「Yuja pop!」手工啤酒 HK$52啤酒加咗鮮柚子皮及鹽，微酸微鹹，味道好清新！ ✦Kombucha HK$50店家自製嘅發酵茶，加咗紅番石榴及荔枝，雖名為茶，隻味較似果醋味，入面仲有好多益生菌，對腸胃好好！ ▲反光鐵管設計，'ello舖頭環境好型格。★－:+:－:+:－:+:－:+:－★🎡味道：4🎠環境：3.5🎪服務：4🕌CP值：3.5（*5為最高分）★－:+:－:+:－:+:－:+:－★◌ 'ello手工冬甩期間限定店◌ 尖沙咀河內道18號K11 Art Mall B2樓中庭◌ 即日至11月15日★－:+:－:+:－:+:－:+:－★🎀 記得like埋我，每日放送打卡好去處！📸www.facebook.com/daydaycheckin💗ᴿᵉᵃᵈ ᴹᵒʳᵉwww.instagram.com/daydaycheckin
