我跟姊妹久唔久就會約埋low tea~而Hotel Icon就係我哋至愛嘅聚腳點！❤️今次我試嘅係佢新嘅 「Häagen-Dazs™ x Champagne Louis Roederer下午茶」，共有十款鹹甜點心，仲可以任食迷你Häagen-Dazs™雪糕杯（100ml）及唯港薈自家製英式傳統鬆餅！真係味蕾大滿足！😍 ▲擺盤勁精緻，靚到唔捨得食！ ▲食之前，Ｗaiter會係點心盤中間加乾冰，保持雪糕甜點冰凍。個人較偏愛佢哋嘅甜品系列，好似「士多啤梨朱古力醬蘸士多啤梨雪糕」或「哈蜜瓜雪糕」，佢哋會因應雪糕口味，製作返相對嘅水果造型外殼，如士多啤梨雪糕就會係士多啤梨殼；哈蜜瓜雪糕就係配哈蜜瓜殼。將甜品放喺匙羹上，好似真係有粒水果喺上面咁！真係令人垂延欲滴！🤤 ▲用水果造型嘅朱古力外殼，封住Häagen-Dazs™雪糕，放喺匙羹上，勁靚！ ▲「哈密瓜雪糕」味道好清新，但唔膩，好驚喜。 ▲咬開朱古力脆皮，入面係滿滿嘅Häagen-Dazs™雪糕，超治癒！不過，佢哋嘅甜品唔止樣靚，味道都比想像中正。一口一個，擺入口時，朱古力殼會爆裂，雪糕湧出嚟，嗰下真係好治癒，加上外脆內軟嘅口感，一啲都唔膩，夏天食真係好爽！其中，我最鍾意佢哋嘅「芒果雪糕配百香果朱古力外層」，百香果殼清香得嚟帶微酸，同芒果撞埋一齊，食完好開胃！士多啤梨味個外殼則有少少芝麻，食時香香脆脆，口感好特別。哈蜜瓜味及椰子味則以香濃Creamy為主，朱古力味就較濃郁，除咗略嫌上面梅子苦咗少少，整體味道都唔錯。 ▲鹹食點心比較一般，正常發揮。 ▲「粉紅香檳血瑪莉伴辣蝦」微辣，好香口，味道OK！至於鹹食，全都加入香檳去料理，個人就覺得好壞參半，可能我本身唔受得好濃嘅酒味，會覺得整體口感過份辛辣。「香檳啫喱鴨肝醬」偏鹹，但鴨肝隻味好香濃，平衝到，感覺幾好。「粉紅香檳血瑪莉伴辣蝦」、「煙三文魚香檳凍批」及「香檳忌廉燴蘑菇」就屬正常發揮，比較遜色係「水晶香檳啫喱配魚子醬」，啫喱好辛辣，帶微苦，可能食完雪糕先食呢隻，唔太試到有味，如前後食嘅次序掉轉，或者會較好。 ▲雙人下午茶都會配２杯白桃士多啤梨Louis Roederer Brut Premier香檳，口感清爽，夏天飲好消暑。 ▲超高落地大玻璃，採光度足，環境好舒適。 ▲好鍾意佢綠意油油嘅感覺。 ▲附上餐單~Häagen-Dazs™ x Champagne Louis Roederer下午茶 HK$628/2（另收加一）供應日期：即日至11月1日★－:+:－:+:－:+:－:+:－★🎡味道：4🎠環境：4.5🎪服務：4🕌CP值：3.5（*5為最高分）★－:+:－:+:－:+:－:+:－★◌ Hotel Icon 唯港薈◌ 尖沙咀科學館道17號唯港薈地下GREEN★－:+:－:+:－:+:－:+:－★🎀 記得like埋我，每日放送打卡好去處！📸www.facebook.com/daydaycheckin💗ᴿᵉᵃᵈ ᴹᵒʳᵉwww.instagram.com/daydaycheckin
