我屋企人好鍾意食涼拌青瓜，疫情下無得出去食+慳錢，唔識都要自學到識為止😝準備材料（約2-4人份量）1）兩條青瓜2）辣椒油3）芝麻油（我用麻椒油）4）豉油（我用涼拌汁）5）砂糖6）鹽7）蒜蓉 首先洗乾淨兩條青瓜表面 之後切走青瓜頭+尾，然後將切出嘅部份與青瓜身打圈磨擦，直到磨出白色泡沫，細個果時阿媽話咁做青瓜就唔會苦（既然係阿媽教嘅記得就做啦🤣） 磨完白色泡沫後清洗乾淨，將青瓜切段然後拎刀平果一面拍開啲青瓜（個人覺得用大刀/豬肉刀類因為闊啲會比較好拍）拍得爛就可以（注意小心用刀）拍完拎隻大碗放晒所有拍開嘅青瓜落去再放1湯匙鹽撈幾下放入雪櫃，等10-15分鐘醃至出水，倒走水份備用（我多數會雪15-30分鐘期間倒幾次水，反正唔夠凍又唔急食） 倒走青瓜啲水後，係時候整涼拌醬料，我會用2湯匙辣椒油+1湯匙麻椒油+3湯匙涼拌汁+1湯匙砂糖+少量蒜蓉和青瓜撈埋一齊再放入雪櫃，想幾時食就拎出嚟，完成！（最好一日內食完）無麻椒油+涼拌汁可以改成2湯匙辣椒油+1湯匙芝麻油+2/3湯匙豉油+1/2湯匙砂糖+少量蒜蓉因每款辣椒油辣度不同/豉油咸度不同/青瓜大小不同，請因應個人口味調整合適的辣椒油/豉油/砂糖份量IG：https://www.instagram.com/darkmoonxox
