試用, 有時係要講資格. 今次試GOODSKIN LABS出嘅TRI-AKTILINE瞬間抗皺除紋霜, 唔知算唔算好事, 自問都算係一個合格者. 原因係你要抗皺除紋, 首要嘅, 係你有皺有紋先… 大份D三十有開, 日久失修. 正好幫大家試真佢. 佢個包裝, 大家唔陌生, 之前成日有廣告. 不過我之前唔太想試, 直頭見到有BLOGGER參加之前D EVENT先有興趣. 原因係…佢D廣告拍到好假. 先上手俾大家睇下, 佢其實好大支, 有30ML, 個嘴又細. 所以唧出嚟可以好控制到份量, 多少隨你. 見BLOGGER最常見係試虎口位D紋. 大家可以睇一睇, 真係即淡紋. 呢隻product 主打三大原素: 1) 植物性類肉毒桿菌 – 原理係放鬆肌肉, 以達到減紋效果, 2) 海藻萃取精華 – 佢有多醣體, 能夠豐潤皮膚, 填補你d紋, 3) 六胜肽蛋白 – 呢樣大家可能熟d, 其實皮膚有紋, 好多時都係膠原蛋白冇咗, 所以冇咁彈性. 呢隻就係用嚟增生膠原蛋白. 不過, 其實一搽上手, 大家會覺得咁滑又少紋, 同上面講嘅唔太關係. 一上手嗰種霧面嘅感覺似曾相識, 一查, 發現果然係佢 – 矽. 佢係會喺皮膚形成薄膜, 填咗你條紋. 所以即時會睇得到滑咗…不過…只能帶來短暫的立即效果, 無法長期維持及吸收，甚至可能會減低其他成份的滲透效率. 因此大家一上手就覺得work, 可能真係瞬間嘅事… 咁, 係咪即係唔work呢? 又唔係, 因為呢隻矽幫你撐一撐, 其實可以令你d紋唔再加深. 長遠嚟計都會幫到你手. 只係佢減紋得唔得, 其實你都係要用返一排先知. 我就做咗白老鼠喇. 大家睇睇效果: (上面係before, 下面係after) 我眼底一向有條深嘅紋. 眼頭, 眼尾都有少計. 不過唔太緊要. 試用期間(兩個星期)我主攻條大坑紋. 我覺得都真係有improve到.不過唔算太多, 始終只係用咗兩個禮拜, 而條紋, 係跟咗我好多年架喇… 同時, 亦因為有矽嘅關係, 假如大家化起妝時冇妝前底霜喺手,呢隻產品係可以頂住當先, 矽其實係幾廣泛咁用喺妝前/止汗product. 大家可以睇睇效果, 一樣係即時變霧面, 毛孔就唔招搖啦~~ 但係有個小提醒, 因為矽會阻礙吸收, 所以建議大家搽咗eye cream先再用. 搽完之後亦要得佢吸收一陣, 先好再化妝, 唔係會有”擦膠碎”都未定架~~
