早兩個禮拜去咗4日3夜台灣亡命之旅, 亡命原因係一肯有四個家庭, 個個都係兩大一小, 小嘅年齡分別為3.5, 2.5, 1.5, 同0.5…其中有兩個家庭係我嘅哥嫂, 惜並冇因此備受照顧, 反之無啦啦變咗領隊, 改booking, 追房, book tour, 乜都上哂我身嚟做. 我個小魔怪亦冇因為去旅行而寬待我, 要扭嘅時候, 比喺香港更加扭. 換嚟, 係我喺寶島台灣, 乜寶物都冇事間睇, 姊妹們推介嘅睫毛呀, 化妝品呀, 我都係望門輕嘆. 好彩, 酒店樓下有間康是美, 開到凌晨三點, 我就凌晨一點幾, 等老公同仔都瞓咗, 先神智不清咁死落樓shopping. 亦因為神智不清, 只係小敗到幾款mask就收手. 不過好幸運, 原本想去台灣買都冇時間買, 反而返嚟香港中到試用!! 講緊係雪芙蘭嘅時間面膜. 佢本身係一個試用套裝, 有齊雪芙蘭八款面膜, 每樣一塊. 基本上你可以因住自己嘅狀態, 一睇個名就知到應該祓敷邊隻. 分別有: 天天透嫩白 – 美白. 最近那個來 – 親戚嚟. 變天不變臉 – 天氣轉. 臨時要約會 – dating前, 應該就係急救喇. 今天我最美 – 似係預你wedding咁, 即係急救中嘅急救. 不怕艷陽曬 – 曬太陽後, 舒緩系. 毛孔太招搖 – 收毛孔. 肌膚秀痘了 – 有痘, 出暗瘡 一時間花多眼亂, 唔知用邊隻先好, 就試天天透嫩白先, 佢話天天嘛~~~ 我assume佢隨時都用得. 上面試, 覺得幾薄貼, 但d剪口位都幾深, 要慢慢調校, 唔係會有隙. 另外, 佢鼻縫係好闊, 眼位亦好大, 所以我摺埋唇上位置, 亦特意鋪上d塊mask, 好得佢敷到眼底同鼻側位置. 敷完上面再睇睇d精華, 都有幾多, 夠搽頸手腳. 敷嘅時候, 覺得佢好似太薄, 屋企開咗冷氣, 覺得d水份好似好快被抽乾咁. 指引建議敷15-20分鐘, 我15分鐘就急急除低佢. 但除落嚟, 又發現原來張面膜都仲幾濕喎. 前後對比一下, 確係有d亮白咗. 比想像中濕. (上面係before, 下面係after) 不過, 一時嘅效果, 唔算得係乜, 打算過一晚之後再影相. 點知…..不幸嘅事又嚟喇!!! 第二日起身一睇……..係, 我又變咗豬頭, 仲豬過上次. 上次係用完mask house蜂毒面膜. 好返之後敷過其他mask冇事, 但今次又中招. 我開始懷疑, 唔係d mask嘅問題. 我一向皮粗肉厚, 30幾年嚟亂咁搽嘢, 基本上都冇出過事. 但而家一個月中兩次, 我覺得係我皮膚本身可能唔同咗, 係咪因為我有做激光, 所以而家d皮膚容易敏感咗? 因為敏感, 我停咗所有護膚品成個幾禮拜. 不過以我敢死嘅性格, 我又再試多一次, 話哂人地俾試用, 我應該係要用完話俾大家聽.只係我都由較mild嘅開始. – 最近那個來….因為, 我真係那個來. 斷估佢呢D非常時期, 佢都唔會俾D太刺激嘅成份我掛, 佢包裝就寫主打控油同保濕. 敷咗上面, 感覺上冇天天透嫩白嗰隻咁覺得被抽乾, 保濕確係好少少. 我心有陰影, 仍然係15分鐘就急急除下. 冇刺痛冇紅, 皮膚唔至於飲飽, 但係有補到水亦有d滑嘅感覺, 同時有少少明亮感. (上面係before, 下面係after) 第二朝起身即刻睇返, 好彩冇腫, 但都有少少泛紅, 真真唔敢再試其他住.. 皮膚冇再有水感, 但係平滑咗. 其後果然一日都冇出油, 控油有做好.(左面係敷mask前, 右面係敷mask第二日) 總括: 雪芙蘭面膜薄貼, 面積唔太大, cutting算ok. 包裝內大量精華, 但上面唔會水滴滴. 皮膚敏感者美白款都係唔好試, 保濕度一般, 但有亮肌之效. 價位應該唔費, 比起紙面膜, 我鐘意gel sheet mask, 但比起厚身紙, 我覺得呢隻薄身嘅較舒服. 某程度我鐘意呢隻多過美麗日記 (正因為唔太鐘意美麗日記, 我好耐冇買, 唔知而家係點….) 點都好, 要養好塊面先可以再同大家分享其他面膜喇.
