講起酒店自助餐，我自己最鍾意就係北角嘅Hyatt Centric酒店裏面嘅The Farm House!我自己食過幾次，每一次嘅質素都好高，今次特登同屋企人再去食過，果然冇令我哋失望，等我帶大家睇吓我哋食咗乜嘢啦！佢哋嘅自助晚餐主題係韓國食品，一入到去選擇一如以往，超級豐富！冷盤區有好多唔同種類嘅海鮮供應，當然仲有我自愛嘅蟹腳，店員仲會好熱心如果見到都會即刻補返，而且佢哋嘅蟹腳質素都好好，隻隻都好飽滿，我食到勁滿足！熱盤區裏邊有好多種唔同嘅環球美食，由於今次佢哋主打韓式美食，所以有好多唔同嘅韓國菜選擇，連我最鍾意嘅三層肉同埋韓式燒肉都有，仲要油花同埋肉嘅比例啱啱好超級靚！另外最估唔到嘅係佢哋竟然有我最鍾意食嘅芝士焗龍蝦，仲要即場喺你面前火炙，真係睇見都流口水！有人話食自助餐，最緊要係食佢嘅甜品，呢度嘅甜品每一次嚟都令我覺得好驚艷！佢哋嘅旋轉式雪糕機永遠都令到我企喺度唔想走開，裏面嘅味道選擇豐富更加有好特別嘅港式味道，而且我自己好鍾意佢嘅雪糕入口唔會好甜，令到你忍唔住一口接一口係邪惡之選。另外，佢哋其他嘅甜品選擇都好豐富，為咗配合返韓式食品呢個題材，佢哋仲有現場製作嘅韓式打糕，入口QQ絕對值得一試！總括嚟講呢間餐廳嘅食品質素，每次都令我好滿意，朋友仔每次問親我酒店自助餐嘅選擇我第一件事都會諗起佢，大家如果想食自助餐嘅話，記得一定要試吓佢唔好錯過啦！🇭🇰 The Farm House香港北角北角邨1號香港維港凱悅尚萃酒店酒店西座2樓🇭🇰點擊圖片放大 +10
