早幾日同朋友去會展參加展覽，行咗半日腳都斷，所以就search下灣仔區有乜嘢好嘢，發現到有間餐廳都幾多好評，所以就去試吓！ 呢間餐廳位於灣仔嘅船街，附近都有好多餐廳同酒吧，不過佢都好多人幫襯都幾full 㗎。呢間餐廳好得意，佢主打帶有港式風味嘅西餐，店家將香港獨有嘅元素加入喺傳統嘅西餐裏邊，令到你每一味餸菜都會食到香港嘅感覺融入咗喺傳統嘅西餐裏面，我今次叫咗三款菜式包括係凱撒沙律，卡邦尼意粉，同埋21天熟成厚切豬扒，等我哋為大家介紹吓究竟有幾特別啦。 凱撒沙律送上睇嗰陣我都覺得平平無奇，不過食落去原來好特別！店家將平時凱撒沙律上面嘅煙肉碎改為鹹香味十足嘅炸鹹魚碎同埋蛋黃碎，一入口完全刺激到你嘅味蕾。佢哋嘅醬汁亦都有特登加入到鹹蛋黃，配合返爽脆嘅蔬菜令到口感變得豐富，我自己都幾鍾意。 之後嘅卡邦尼意粉一上枱我以為同平時嘅一樣，點知一入口又係有驚喜！意粉上面嘅肉，絕對唔係平時一般見到嘅煙肉或者火腿，店家竟然用咗金華火腿同埋臘肉代替一般嘅煙肉，估唔到味道出奇地夾！臘肉本身帶有嘅獨特鹹香，令到整個意粉嘅味道變得有層次感，而且唔會令到卡邦尼意粉變得油膩，絕對值得一試。點擊圖片放大 +2 21天熟成厚切豬扒我同朋友都好推介！豬扒嘅肉質好淋一啲都唔鞋，輕輕用刀一切就已經ok，而且豬扒每一口都好Juicy多汁真係勁好食！而且店家特地用紫背天葵同埋蘋果蓉作為醬汁，令到豬扒每一口真增甜味同埋清爽嘅味道，再一次將中西食材完美咁樣配搭得好好，總括來講我覺得呢間餐廳都值得一試，大家有興趣嘅話記得去預約啦！🇭🇰 Flagship香港灣仔船街35號地舖🇭🇰
