近呢幾年因為疫情嘅關係，所以多咗好多外賣小店，亦都因為咁外賣小店由主要售賣小食類都開始慢慢轉型，仲多咗好多主打賣唔同類型飯團嘅舖頭，今次我想介紹呢間小店好特別，佢哋主打沖繩 x 台灣風既飯團，賣相仲好吸引㗎！ 店舖裝修嘅風格都好日本風，而且門口更加印有沖繩嘅傳統logo石獅子，比人哋一種好Chill嘅感覺。 佢哋飯團嘅種類都好多，而且仲有每日嘅期間限定神秘飯團，仲可以加錢去配搭返屬於自己個人風味嘅飯團同埋套餐，啱晒我呢啲樣樣都想食嘅人。 今次我就叫咗佢哋既炙燒明太子飯團加炸天婦羅，另外仲有地瓜紫薯麻薯波波配桂花烏龍茶。每一款飯團因為人手製作嘅關係，所以飯團全部都新鮮製成，亦都唔需要擔心紫菜淋晒口感變差嘅問題。 佢哋嘅炙燒明太子飯團真係超香，烤香左嘅明太子醬汁配合飯團真係令人食指大動！而且裏面嘅材料都好豐富，雞蛋同埋午餐肉都係厚切，再加入咗啱啱新鮮炸好嘅天婦羅蝦，令到成個飯團嘅口感同埋味道更加豐富，Size仲要好大隻，食完之後完全有飽足感，唔會好似食壽司甘唔夠飽。佢哋嘅小食我覺得質素都唔錯，麻薯波波入口QQ，而且因為係新鮮炸起嘅關係所以入口有軟糯感。我自己好鍾意佢嘅飲品選擇都好多，而且無糖茶仲有好多種，最重要嘅係佢哋嘅茶完全冇加任何冰塊直接冷藏，可以原原本本咁飲到茶嘅味道，唔需要驚比冰粒沖淡，我真係好欣賞，我覺得呢間小店質素都幾好，而且佢係好多地方都有分店，方便大家可以買完之後食用，而且對產品都好有熱誠，大家如果經過嘅話記得去試吓！ 🇭🇰 飯丸屋香港西環皇后大道西425號H地下前座A舖🇭🇰
