最近有幾個朋友不約而同都推介觀塘有間西餐質素好高而且好好食，咁啱早幾日喺觀塘做嘢所以就同朋友仔特登book咗去試下。呢間餐廳同我之前食嘅西餐有啲唔同，睇返個Menu佢哋嘅set dinner有根據唔同嘅時節去配搭食材。喺最近炎熱嘅天氣佢哋安排咗充滿飽足感而且好清爽嘅法國南部style西餐，我同朋友仔都食到舔舔脷！ 佢哋嘅set dinner總共有六個course，性價比我都覺得唔錯之餘佢哋嘅賣相仲十分之精緻，全部都係IGable 架！ 第一道菜係用左法國出產嘅55度溫泉蛋配合魚子醬，一聽到個菜式就知道勁華麗。店家用咗鳥巢作為設計好別致，而且食飯分別係可以分開食唔同嘅食材，同埋融合埋一齊食，鹹香十足嘅魚子醬配合香滑而且香味十足嘅雞蛋，絕對為你打開味蕾。 之後嘅係煙燻北海道帶子配Parma ham椰菜泥。佢哋利用蘋果木去煙燻整個彩色，賣相真係超級靚打卡一流，而且Parma ham經過烤焗之後變得好酥脆，煙燻過嘅帶子口感十足，由於菜式底部用檸檬葉，帶子完全滲入左檸檬葉嘅清爽同埋蘋果木味道，係我其中一個最鍾意嘅菜式。 之後嘅係迷你牛尾冬甩，賣相好得意，而且仲有即管可以直接將牛肉嘅醬汁吱係冬甩入邊，食入口完全冇牛肉嘅騷味，而且冬甩吸收左牛肉醬汁嘅味道，配合返底下嘅蕃茄燉蔬菜，真係超好食完全唔會有食肉嘅感覺。 下一款餸菜係蟹肉蕃茄湯配雜錦蕃茄温沙律。唔好睇小呢個菜式好似平平無奇咁，我同我朋友都超級鍾意呢個湯，佢係湯帶金黃色，估唔到入口蕃茄嘅鮮味源源不絕咁樣深入你嘅味蕾，完全冇蔬菜嘅草青味，係絕對田園嘅感覺！而且佢哋將唔同品種嘅蕃茄好細心咁樣剝皮加入湯品，每一款蕃茄唔同獨有嘅味道都會為湯品升華到另外一個層次，配合返手拆嘅蟹肉真係一流享受，完全清爽冇負擔！ 之後嘅係法式放養鴿配合紫薯泥給山楂汁。鴿肉味道香濃，表皮煎到油花十足，而且熟成都恰到好處，完全食到最鮮嫩嘅味道，配合紫薯泥同埋山楂汁令到入口變得唔會油膩，值得一試。 食到呢度其實已經好飽，不過估唔到仲有店家自家製嘅松露意粉！佢哋嘅松露意粉嘅松露真係超好食，完全係入口即溶嘅感覺，而且佢嘅醬汁掛喺手工麵上面剛剛好，絕對唔會太水或者太乾，手工面入口QQ，係al dente嘅口感，我自己都忍唔住秒速清碟！ 最後仲有甜品！佢哋嘅甜品係朱古力球配提子冧酒雪糕。店員會喺你面前直接點着冧酒，利用熱力將朱古力球溶化，真係超級靚忍唔住一定要影低佢！雪糕裏面嘅提子用冧酒浸泡過之後粒粒都好飽滿，每一口咬落去都有濃郁嘅冧酒香味，配合返清爽嘅雲呢拿雪糕，絕對為今晚呢餐話下一個完美嘅句號。大家聽我講咗咁耐係咪都好想試吓呢？我自己覺得呢間餐廳不論店員嘅講解同埋美食擺盤味道都好高質素，已套餐六百幾蚊來講絕對係超值之選，我自己都好推薦大家可以同朋友食飯慶祝或者男女朋友嚟撐枱腳，有興趣嘅你千祈唔好錯過！🇭🇰 Parallel香港觀塘道414號亞太中心3樓302號舖🇭🇰
