要數到最近香港出名嘅排隊名店，呢一間麵包店一定係當之無愧！依家麵包店咁出名嘅原因係因為佢哋係前四季餅廚主理架，而佢哋嘅王牌產品就係招牌菠蘿皮麻糬波波，今日雖然有啲落雨，但係見到人龍唔算好長，所以都特登排隊去試吓。 聽朋友講如果平日下晝去嘅話都需要排至少55分鐘先可以買到佢嘅麻薯波波，我今日夜晚八點左右去到，而且今日落雨都等咗大概15分鐘，絕對可以感受到究竟佢有幾HIT! 由於我去到嘅時間都有啲晏，不過都好好彩比我可以買到四個味道，包括有菠蘿味，朱古力味，伯爵茶味同埋綠茶口味。喺排隊嗰陣聞到佢焗好香甜嘅味道就已經食指大動，超級期待，由於佢嘅麻薯波波係即時新鮮製造嘅關係，所以你拎到麻薯波波嘅時候係熱到出煙架，大家記得唔好咁快閂晒成個拉鏈，以免有倒汗水整淋咗個包！ 雖然真係勁想即時試吓，不過始終而家疫情關係，所以我都係拎咗返屋企先慢慢食，不過因為返屋企都要啲時間所以麻薯波波返到屋企已經有少少扁咗嘅狀態，不過絕對唔會影響麻薯波波嘅口感，等我為大家試一試菠蘿嘅味道先！點擊圖片放大 菠蘿味嘅麻薯波波好味道冇我想像中咁甜，比起平時食到嘅菠蘿包嘅甜度再低啲，雖然我都放咗一段時間先至食，不過絕對冇影響佢外表鬆脆嘅口感，佢外表菠蘿皮比起出邊嘅較為鬆散，口感比較砂粒狀，我覺得都幾好食架。另外麻薯波波嘅本體好煙銀，入口好QQ，同佢嘅外表形成強大嘅對比，不過兩隻口感加埋一齊都幾和諧。缺點方面我會覺得平時菠蘿包嘅味道稍為有啲不足，不過整體來講都不錯吃，如果以大概$8至$10一個嘅價錢嘅話我覺得其實都值得試吓，至於值唔值得用接近一個鐘排隊去買嘅話就見仁見智啦。唔知大家又有冇試過呢？歡迎大家係下面留言話俾我知啦！🇭🇰James Bon Bon Bakery香港銅鑼灣邊寧頓街9-11號登龍閣地下C1舖🇭🇰
