喺香港地要搵日本菜絕對唔難，特別係日本嘅拉麵而家更加開到最成行成市，普通嘅拉麵我相信大家都成日食到，但係唔知道大家有冇食過日本嘅撈麵呢？ 最近有一間日本過江龍嘅店舖嚟咗香港，呢間店舖主打係日式撈麵，聽講仲要係香港第一日式撈麵專門店，每次食飯時分搭車經過都見到大排長龍，所以都忍唔住放假特登去試吓！點擊圖片放大 店舖裏面嘅裝修都好特別，裏邊掛咗幾幅聽講係日本嘅人氣書道家万美親自到香港畫，令到店舖充滿書卷氣，絕對係打卡嘅好地方。點擊圖片放大 今次我點咗佢哋舖頭最出名嘅正宗全料東京撈麵，聽到個名咁有霸氣就知道佢用料十足！材料超級豐富，有調味左嘅肉碎同埋豬肉粒，醬油糖心蛋，筍絲，青蔥，紫菜等等嘅材料，中間仲要放咗一粒蛋黃，睇到都好吸引！ 店舖內特登印上撈麵嘅四種食法俾大家做參考，我自己當然食咗原味先啦，一入口感覺麵條好QQ，感覺上似烏冬同埋拉麵嘅綜合體，而且因為蒜頭同埋蛋黃嘅加持所以成個面好滑好香，豬肉入口好爽，而且醬油糖心蛋有少少鹹，醬油嘅味道已經滲入左去蛋嘅入邊，佢哋嘅筍絲亦都唔會硬，絕對係高質之選。 第二個食法係加入即磨嘅胡椒，胡椒香味好突出，配合返成個撈麵嘅話味道會變得更加濃厚。第三個食法亦都係我最鍾意，就係加入店舖秘製既kokoro 昆布香醋，醋嘅味道唔會太酸冚過左成個撈麵原本嘅味道，反而令到成個撈麵嘅味道得以提升，微微既酸味令到食慾大增。第四個食法就係加入白飯，配合返撈麵嘅材料可以變成肉燥飯，絕對會帶俾你另外一個口感，大家如果有興趣嘅話記得要去試吓啦！ 🇭🇰KOKORO MAZESOBA HK香港灣仔軒尼詩道68號地下1C號舖🇭🇰大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請
