最近可能因為天氣嘅問題所以覺得好腌悶，所以都想食啲特別嘅嘢，咁啱朋友介紹咗一間新開嘅fusion南美洲菜，聽個名好得意咁所以就去試吓！ 呢間舖頭個裝修風格好舒服，雖然位於唐樓樓上鋪，但係我一開到門嗰陣就會發覺去咗第二個世界，係一個好CHILL嘅工業風，配合返音樂真係好放鬆。佢哋Menu嘅餸菜款式唔多，不過全部都好特別好想試吓，今次我哋叫咗牛油果醬煙熏鮭魚他他，招牌黑豆豆蓉餡餅，MOBIN墨西哥包，甜品方面就叫咗紐約芝士蛋糕配自家製龍舌酒焦糖醬。點擊圖片放大 +2 牛油果醬煙燻鮭魚他他好開胃，微微嘅酸味配合爽脆嘅洋蔥，完全可以刺激到味蕾，配合返佢哋嘅Cracker食用，令到口感層次更加豐富，係一個好完美嘅開胃菜！ 墨西哥包結合港式嘅風格,佢哋用咗香港嘅土炮產品墨西哥包配合焦香嘅芝士。加入半熟蛋，自家醃製嘅德國酸椰絲，煙肉等等嘅配菜組成一個無論外型同埋口感都好特別嘅飽，估唔到呢個包意外咁有一個好特別嘅效果，全部用料加埋一齊好合拍，一啲都唔會有衝突嘅感覺，絕對可以一試。 墨西哥黑豆蓉餡餅上面嘅煙燻辣椒粉味道好突出，帶出咗本身餡餅裏面嘅芝士嘅鹹香味，由於用黑豆蓉代替左平時常見嘅肉類，所以感覺好健康，食好多都唔怕肥。食墨西哥餡餅當然唔少得佢哋嘅靈魂，牛油果醬料同埋莎莎醬。呢兩款醬料都令到成個餡餅感覺好清爽唔會好漏，令到餡餅嘅味道變得冇咁單一。 芝士蛋糕入口好香甜，上面嘅焦糖醬用咗龍舌酒烹調左之後會帶有顆粒嘅感覺，每一啖入口都會有微微嘅酒香散發出黎，配合返幼滑嘅芝士蛋糕，絕對為呢餐畫上咗個完美嘅句號。 🇭🇰Mobin九龍旺角洗衣街37號一樓🇭🇰大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請
