一踏入夏天,日日酷熱天氣警告仲要30幾度,一出街就已經身水身汗。除咗個人燥底之外,食慾都減低咗好多。最近見到好多朋友仔都去咗食夏威夷蓋飯,睇落去好吸引好清爽咁,所以都帶屋企人去試吓先! 一去到餐廳估唔到大排長龍,平日晚餐時間去食都要等20分鐘左右先有位㗎!我哋今次嗌左兩個自選蓋飯,另外叫咗一杯牛油果奶昔。 我自己揀咗三文魚雜錦香菇牛油果豆腐沙律菜蓋飯配胡麻醬。份量超級大,而且啲餸菜都好多好豐富,三文魚入口唔會有腥味,配合埋牛油果同埋胡麻醬,入口好滑,而且因為胡麻醬嘅關係,味道帶點酸,真係超開胃!佢嘅沙律菜都好爽脆,唔會有太多嘅水份喺上面,所以啲醬料都可以黏附喺唔同嘅食材上面,呢度絕對係加分位。而且佢上菜嗰陣保持住溫度係屬於微溫嘅狀態,一口仲可以包含唔同嘅配料,夏天食真係一流。點擊圖片放大 我屋企人就叫咗雞肉蟹棒豆腐鷹嘴豆沙律菜蓋飯配柚子沙律醬汁。我自己十分之推介呢個醬汁,佢入口好香甜,然後會慢慢滲出一陣柚子嘅香味,而且都唔會太酸,大人小朋友都好啱食。聽店員講原來佢哋嘅柚子沙律醬同埋鰹魚醬油原來都係自家調製,難怪入口好特別!鷹嘴豆一般係形容喺中東嘅料理上面,所以我屋企人見到餐牌有呢個選擇嗰陣覺得好特別,佢哋嘅鷹嘴豆入口唔會爛蓉蓉,而且雞肉都唔會好乾,配合醬料同埋食材入口好清新,係一個健康之選! 另外我哋都叫咗一杯牛油果奶昔試吓,聽講呢杯奶昔係佢哋嘅鎮店之寶黎架。奶昔嘅入口好順滑,完全冇顆粒,而且牛油果嘅味道好香濃,唔會有草味,果腹感重,食完個飯再飲完之後簡直飽到上心口。係呢個夏日炎炎嘅氣候,呢個飯簡直係消暑之選,大家如果經過嘅話都可以試吓㗎!點擊圖片放大 🇭🇰 PokéToké香港九龍旺角廣華街3號百利達商場地下1號舖🇭🇰大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請