又係我想去旅行系列！每年嘅三月中就係櫻花盛開季節，雖然香港而家多咗睇櫻花嘅地方，不過我最鍾意嘅莫過於係日本見到嘅櫻吹雪，花瓣隨風飄落真係好浪漫！ 最近去銅鑼灣行街，見到豚王門口掛住幅畫幾得意，睇返啲內容先知道原來佢哋因為今年10周年所以就搞咗個櫻花祭，仲邀請咗日本嘅切繪大師大橋忍先生創作左一幅以花見作為主題嘅作品，呢幅畫能夠展示到櫻吹雪嘅感覺，真係好有意境！除咗呢幅作品之外，原來豚王都推出左以櫻祭為主題嘅一系列產品，全部嘅產品都好有少女心，我同朋友都即刻心心眼沖左入去食！點擊圖片放大 佢哋呢個系列嘅產品包括有櫻拉麵，櫻花水玄信餅同櫻花口味可樂。佢哋另外仲有提供來自日本奈良嘅限定櫻花酒架！我自己本身係櫻花季節出世，所以對櫻花有一種情意結，一見到呢啲產品就忍唔住每樣都叫，真係出晒事！ 首先櫻花口味嘅可樂都幾得意，有輕微嘅可樂味，粉紅色嘅外表加埋復古嘅樽真係超靚，我朋友都忍唔住話想拎返屋企當花樽用添！ 跟住主菜櫻拉麵出場啦！睇返佢哋嘅餐牌得知，原來粉紅色嘅湯底係來至紅菜頭，忌廉同埋雞湯組成，比起豚骨湯底相比入口比較清淡，飲落去都覺得健康d，負擔感冇咁重。而且因為咁櫻花蝦嘅香味仲突出左。 拉麵嘅配菜有爽脆嘅紅椰菜同埋蓮藕，佢嘅筍絲亦都好淋好入味，啱晒我哋呢啲好怕肥嘅人。而且雞肉嘅入口好Juicy，再加埋佢打卡感十足嘅櫻花水玄信餅，呢一餐簡直滿足到我嘅少女心同飽足感大家如果有興趣都可以去試吓㗎！🇭🇰 豚王香港銅鑼灣登龍街18號V Point 地下4號舖🇭🇰
