上星期去尖沙咀買嘢順便約咗一班朋友食飯，本身想食嘅餐廳咁啱冇位，機緣巧合之下就去咗呢間餐廳，同行嘅朋友一致都覺得呢間餐廳真心唔錯！ 我哋今次叫咗生蠔拼盤，炭烤澳洲M5和牛肩肉伴法式忌廉焗薯，炭烤西瓜牛扒，龍蝦汁天使麵伴大虎蝦三文魚籽，黑松露大啡菇芝士意大利飯，黑松露薯條同埋兩款雞翼，一聽到陣容就知道我哋飽到痴線！ 首先出場嘅係生蠔拼盤，講個秘密比你哋聽，其實小妹係第一次食生蠔！拼盤裏面有三款唔同層次嘅生蠔，睇落去好新鮮一啲都唔腥，所以就鼓勵我奉獻咗第一次啦！生蠔嘅口感唔錯鮮味十足，配合返佢嘅醬汁襯托到生蠔鮮嘅味道，搞到我食完一隻又想食第二隻，真係出晒事！ 炭烤西瓜牛扒都係另外一款我好期待嘅菜式，之前聽過好多次，但係香港好少見，所以一定要試吓！炭烤西瓜牛扒入口香甜，食得出蜜糖嘅味道，佢冇咗平時食西瓜爽脆嘅口感，反而有少少好似食緊牛筋咁好得意，軟林林QQ咁嘅好特別。 跟住出場嘅係我哋全場期待嘅M5和牛，超好食超級鮮嫩，而且重牛味，雖然佢附有醬汁，不過我覺得完全唔使點都已經好好食。佢嘅法式忌廉焗薯亦都唔惹小，薯蓉裏邊食到牛嘅香味，同牛肉嘅味道互相輝影，朋友們一致推介呢個菜式！ 至於龍蝦汁天使麵我覺得幾入味，虎蝦好大隻有炭烤香味，不過未去到好驚艷。大啡菇意大利飯，雞翼同埋薯條我就覺得不過不失啦，可能因為之前嗰幾個菜式太好食，比較之下就平淡啲。點擊圖片放大 +3 呢間舖頭嘅人均消費都唔平㗎，每個人差唔多$400左右，不過如果一班朋友慶祝或者傾偈嘅話呢度會係一個好地方，大家有興趣都可以試吓！🇭🇰Oasis Bar & Grill香港尖沙咀諾士佛台1號8樓🇭🇰大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請
