難得喺我屋企附近呢個鳥不生蛋嘅地方竟然開咗間可以打卡嘅餐廳，仲要主打食台式美食，梗係唔執輸要試吓啦！ 餐廳嘅裝修風格偏向工業風，走舒適休閒嘅路線，另外都有啲小手作同埋咖啡豆售賣，由於今日有啲忙，所以唯有買幾個外賣返去試吓。 一望餐牌發現食物嘅價錢竟然比飲品仲要平，而且主食嘅套餐價錢大概係六十幾到九十幾左右仲免費包含一杯冬瓜茶，都幾抵食。 今次我叫咗打抛肉飯，燒豬腩肉飯，台式牛肉乾伴麵同埋一份肉鬆芝士蛋餅。每份主食裏面另外再包括咗豆乾，半隻滷蛋同埋醃菜作為伴菜，睇落都幾豐富㗎！點擊圖片放大 頭先想講嘅係佢嘅豆乾，平時食嘅豆干比較硬，唔到佢呢隻軟林林仲要勁入味，超級好食！另外台式牛肉乾伴麵入邊嘅牛肉炆得好淋好入味，伴麵就正常合格水平啦！燒豬腩肉飯就好香口，油花好足之餘，豬皮都好QQ，減肥者慎重！ 打抛肉飯反而係我哋覺得最驚艷嘅菜式，我起初以為佢會類似泰式打抛肉飯係香葉炒肉碎嘅風格，點知打開包裝完全冇香葉喺裏面，不過食落口反而有好多香料嘅味道，仲有少少好似食緊印尼沙嗲醬沙律嘅感覺，雖然唔係我哋想像嘅，不過我哋一致都覺得好好食，好值得推薦！最後嘅芝士肉鬆蛋餅我哋都覺得唔錯，蛋味香濃鬆軟，絕對值得一試！🇹🇼叁瘋 Mad Coffee Roasters香港鴨脷洲大街132號合時大廈地下F號舖 🇹🇼大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請
