平時少過港島區，印象中，好似只去過太古城中心一兩次。一直唔知道原來太古城中心咁方便，一出地鐵，已經直接連接出口。 入到太古城中心，行行下，抬頭見到好大好大條吹氣彩色毛毛蟲，The Very Hungry Caterpillar 呀！小朋友一定識佢。 原來今年係呢本經典繪本童書出版五十年，太古心中心舉行「World of Eric Carle 童心童閱」。 Eric Carle 就係呢本書嘅著名繪本大師，呢個活動以佢三本作品為主題，分別設立三個玩樂區： 《10 Little Rubber Duck》講述小鴨嘅海上冒險，小朋友進入暗暗嘅場區，以手電筒，照照照，會照出好多動物架。 《PaPa, Please Get the Moon for Me》場區，將繪本中嘅插畫呈現，大大副深藍夜空佈景區，上面吊住好多星星，企係度影相真係好靚。 《The Very Hungry Caterpillar》，唔洗多介紹吧。佢係全球最受歡迎著作，佢嘅遊戲區正係小朋友最喜歡玩嘅巨型滑梯。滑梯外嘅兩旁都有裝飾佈景，影相一流。 而週末假日嘅下午，2米高嘅毛毛蟲仲會出現於商場，大家可以野生捕穫佢。 展區旁邊，係誠品書店專賣區，有 Eric Carle 嘅多本繪本圖書外，仲有好多造型商品。誠品書店 × CityPlaza 仲安排咗10場工作坊同家長故事學堂，有興趣的可以參考我影嘅時間表。 其實商場較早前仲進行緊親子講故事比賽招募，參賽者要將指定故事情節演釋，拍成2分鐘片段。稍後，太古城中心會上載參賽片段到 Facebook，最後會選10位參賽者參與 9月15日嘅決賽，競逐豐富獎品。 呢個暑假淨番兩星期，各位不妨帶小朋友去影下相，睇下書啦。 【活動詳情】 日期: 8月16日至9月15日 時間: 11am~9pm 地點: 太古城中心二期中庭 及 中橋
