皮皮今年的暑假好短，過兩日便開學，開始他的K3課程！ 估唔到個囝大得咁快，個樣傻奸奸但讀K3喇@@ 究竟知唔知今日社會發生緊咩事呢？ 今日我就帶皮皮去上班，體驗下做醫生／護士／消防員等各種職業的辛酸！媽媽我返工好辛苦架！～～～睇下你今日醒唔醒先！ 馬灣挪亞方洲這個暑假7月23日至8月30日，逢星期四至日有個《暑假特工大聯萌》玩，適合11歲以下小朋友來體驗各種職業，唔洗額外加＄玩架！一張挪亞方舟小童入場券＄138就可以玩哂幾種職業，媽媽我覺得好抵玩！所以今次篇blog 又會水蛇春咁長地分享。。。哈哈@@@ 雖然我地好多時入馬灣玩，但就冇去過挪亞方舟，原來呢道都幾多野睇架！ 當我諗住去排隊攞籌玩職業體驗時，皮皮卻被魔術師吸引住～ 呢個魔術師哥哥好搞笑！皮皮好主動舉手話想一齊變魔術，叮一聲！咁就成功！又真係幾盞鬼@@ 跳一跳畫面，皮皮已經變身成消防員啦！係咪好英先～～ 其實起初都擔心阿皮唔玩職業體驗架（佢好有性格的XD），但我估唔到佢好投入又好主動玩！ 第一個職業是「智勇消防體驗營」，有消防教官訓練這班小學員做小小消防員～ 在消防教室阿SIR教左好多消防知識比小消防員，當中阿SIR教，走火警要有逃生三寶（鎖匙、電話、濕毛巾），呢個口訣回到家阿皮仲記住，真係堅學到野！醒啊！ 然後玩滅火筒！呀～～唔係，係阿SIR教用減火筒，班小朋友好驚啊！減火筒一開好大聲「咋」一聲架！ 當中仲有模擬實戰，媽媽我扮哂野被困火警現場，一齊走過煙霧瀰漫的火災場景，小小消防員仲要一齊救火，水槍真係有水架！勁好玩～～～真係好逼真地危險，皮皮仔最中意玩呢個GAME！ 最後一班小小消防員成功挑戰！個個都合格！好威呀！ 一人一個金斧頭，真心覺得皮皮救我一刻好英勇，認識消防知識好重要架！ 之後參加「智愛育嬰小護士」，呢個時侯皮皮「好有性格」終於來了，佢話護士係女仔職業，所以佢唔玩湊BB！（嘩，咩你同你爸爸咁似，你爸爸都好怕湊BB，即係你細個嗰時爸爸好怕幫你抺pat pat囉。。。） 唔緊要，雖然阿皮唔玩，但我就睇其他小朋友玩足全程，男孩子真的對BB冇乜愛心，又亂黎。。。相反女孩子對BB呵護備至，關懷十足，女仔的確係溫柔D既～～～ 皮皮既BB真可憐，好慘被冷落在一邊，不過我諗要阿皮湊B真係會好恐怖XD。。。 哈哈哈@@ 第三份職棊是「智仁醫生大發現」，妙手仁心細路版？班細路做唔做得黎架？？？ 皮皮初頭又玩野，話套醫生衫唔靚唔想著，但睇睇下小朋友玩佢又要玩，原來佢好留心醫生姐姐講乜架！ 當醫生姐姐問：「如果我地身體冇左任何一樣器官會點架？」 全場淨係得阿皮答：「會死！」 咁恐怖既事真係你先答得出XD，個答案又啱喎，阿媽在旁真係忍笑忍得好辛苦@@ 做醫生又真係幾型，皮皮耳朵上的聽筒係可以聽到人的心跳和呼吸聲架，咪以為係玩具，職業遊戲好逼真的！ 呢個時候媽媽會扮演病人去睇醫生，話時話我真係有D唔舒服，黃皮皮醫生好認真細心咁幫我聽下身體邊度有毛病，仲幫我處方執左濟藥，阿皮醫生醫我真係心都甜哂～～～ 扮醫生真係好好玩，轉個頭去左手術室，皮皮話有個病人的肚子生Blue tape菌，哈哈！勁搞笑～ 有內藏的假人公仔睡在手術床上等班小醫生救架！一切開個肚，就會見到腸呀、腎呀等內藏，咁細個上Bio堂真係獲益良多！ 最後班小醫生當然實習成功啦！挪亞醫院的小醫生們全部都妙手仁心架！ 最後一份工是 憑自我 硬漢子 拼出一生癡....既「智機小警察學堂」，一齊黎睇下皮皮SIR既蝦碌英勇故事啦！ 今日兩位警官訓練呢班豆丁成為小警察，除暴安良、伸張正義！ 個個坐定定又好似幾乖幾醒咁！ 要訓練警察既紀律，一切從步操開始！呢班傻奸奸既小警察，開頭成盆散沙，但經阿SIR訓練，好快都排到整整齊齊，真係要比個敬禮阿SIR至得！ 跟住好玩啦！係射擊訓練～蝦碌的皮皮SIR 'R'哂頭唔知點做，阿SIR見佢傻傻下於是教返佢兩招，最後竟然比佢射中100分，勁喎！ 皮皮SIR真係好蝦碌，當大家可以在警察學堂畢業之際，皮皮就調轉帽戴、又跌銀笛獎和警帽，蝦碌到爆燈！但真係好搞笑～～～ 正所謂：「揸起支搶唔似阿SIR」，咪就係皮皮咁既蝦碌樣囉XDXD 每完成一個職業體驗，在場的教官都會提下爸爸媽媽回家做這份由著名親子教育專家張笑容女士所設計的「兒童品格強項中文問卷」，了解你小朋友品格專長～太好了！平時媽媽我好中意睇張笑容的專欄架！等我了解多些孩子的性格、優點和能力所在，教仔時有多D計，建立孩子正面成長路！ 除左以上4大職業，仲有其他《大聯萌》遊戲玩架！當日玩4個職業遊戲都玩左成日，一個Game大約45分鐘，非常充實，小朋友們唔止玩咁簡單，學到有用知識先至係重點（怪獸媽媽心態）！ 另外挪亞方舟內還有其他遊樂活動的，皮皮在這個室內沙池玩左好耐唔捨得走～ 仲有我地參觀左2次「方舟博覽館」，入面有稀有的爬蟲類動物睇，比我想像中要多！皮皮好中意睇昆蟲、古怪類動物的，所以要睇2次囉！意外的很好看！ 仲有遊方舟必逛的「方舟奇園」，一比一的動物奇觀，皮皮表示：「好厲害呀！」 最正係青馬大橋靚景！好開心今日可以放下工作陪仔放暑假～ 玩完《暑假特工大聯萌》後看得出皮皮是個喜歡冒險和英勇小孩，他太愛刺激和危險的事了。。。而且有點驚喜是感到他又長大了點，之前真係好怕醜，但今日的他真係好多野講，有自己主見和主動了很多！ 《暑假特工大聯萌》 日期：2015年7月23日至8月30日(逢周四至周日) 時間：上午10時至下午6時 地點：香港新界馬灣珀欣路33號挪亞方舟 入場費 ：成人HK$168；小童及長者HK$138。 *小朋友進場後可免費參加以上活動 詳情：http://www.noahsark.com.hk/tra/seasonal_event.jsp 關於daidai ＆ pipi： Daidai ＆ pipi 的快樂魔法 博客： Blogspot ． MyBB.com.hk星級Blogger ．ohmykids Beauty Exchange ． she.com ． elle ． WeShare ． ubeauty ． 88db instagram：daidaipipi http://instagram.com/daidaipipi/ 微博：http://weibo.com/daidaipipi email: yuijoan@gmail.com
